Српскиот претседател Томислав Николиќ во интервју за руски Интерфакс изјавил дека најважниот услов за влегувањето на Србија во ЕУ ќе биде признавањето на Косово, на што „можат да се согласат само робови“.

Николиќ нагласил дека Србија тоа нема да го направи бидејќи на еден ваков услов не би се согласил ниту еден народ.

„Мислам дека најважниот услов за пристапувањето на нашата земја во ЕУ ќе биде признавањето на независноста на Косово, но Србија нема да ја признае и никогаш не ја признавале, а тоа јасно го кажувавме и на претставниците на сите европски земји и институции. Но, ако ЕУ продолжи да инсистира на таква одлука, тоа ќе значи дека ЕУ не сака да нè види во својот состав“, рекол Николиќ, додавајќи дека во една таква состојба совеста на Србија ќе биде чиста, бидејќи сите знаат дека направиле сè за станат членки на ЕУ.

„Но, на таков услов не би се согласил нити еден народ. На тоа можат да се согласат само робови“, рекол српскиот претседател.

Запрашан за тоа кои чекори треба да се очекуваат од Белград доколку развојот на соработката со Русија стане пречка за интеграцијата на Србија во ЕУ, Николиќ одговорил дека такви претпоставки не постојат поради тоа што во односите со ЕУ најзначаен проблем претставува Косово.

„Решавањето на ова прашање е основен услов за нашето пристапување кон Европската унија, додека односите со Русија, конкретно воведувањето на санкции против неа, може да стане проблем дури откако станеме членка на Унијата“, рекол Николиќ.

Тој додал дека Србија и го претставила својот став на европските претставници, а тоа е дека во моментов таа не се согласува со воведувањето на санкции против Русија, но дека кога ќе стане членка на ЕУ, тогаш ќе биде обврзана да води заедничка надворешна политика.

Сепак, според Николиќ проблемот со Косово е прашањето кое мора да се реши за земјата да стане членка на ЕУ, и мора да се исполнат условите кои на Белград и Приштина им ги поставуваат поединечни, доста влијателни земји.

„Конкретно, еден од овие услови е да потпиеше меѓусебно обврзувачки договор. Иако ЕУ говори дека во процесот на преговори со Србија останува неутрална во однос на прашањето за статусот на Косово, воглавно највлијателните земји на ЕУ веќе ја признаа незавсноста на Косово“, рекол српскиот претседател, кој се наоѓа во дводневна посета на Русија каде ќе присуствува на „Парадата на победниците“, по повод одбележувањето на 70-годишнината од победата над фашизмот./крај/мф/бс