Српскиот претседател Томислав Николиќ изјавил дека Србија со тоа што не и воведува санкции на Русија покажа на која страна е во спорот помеѓу Западот и Русија, иако сака да стане членка на Европската унија (ЕУ), пренесуваат руските медиуми.

Во интервју за руската телевизија „Царград“, Николиќ изјавил дека Србија и самата трпела поради санкциите, но и дека „самата себе би се погазила“ доколку воведе санкции кон некого само поради тоа што другите ги воведуваат, или пак да ја признае независноста на Косово „поради тоа што е признаено од некои големи и моќни сили“.

„Во моментов сме во состојба во која Русија, која што е наш голем пријател, и ЕУ, кон која тежнееме и сакаме да бидеме дел од неа, имаат некаков спор и доста тешко е да се определите за некого во овој спор. Но доколку барате знак, тоа што Србија не и воведе санкции на Русија е знак на чија страна сме во спорот и тоа е мотивирано од нашата историја“, рекол Николиќ.

Тој додал и дека пет членки на ЕУ не је признале независноста на Косово, „бидејќи би било против интересите на тие пет држави“, додавајќи дека „како што тие можат да бидат членки на ЕУ а да не ја признаат независноста, така и Србија може да влезе во ЕУ, а да не ја призае независнота на Косово“.

„Тоа е единствениот услов кој Србија не може да го исполни, не сака, нити пак тоа и го дозволува историјата, нити иднината на нејзините деца, а тоа е поради еден морков да добие стап, поради некој напредок, особено во уредена земја и економија, да го издаде она за што милиони Срби го загубија својот живот“, рекол српскиот претседател./крај/мф/бс