Околу илјада мигранти кои изминатиот викенд од Македонија минаа во Србија, успеале ноќта меѓу понеделникот и вторникот да влезат во Унгарија, пренесуваат агенциите.

Оваа голема група мигранти и бегалци во Унгарија од Србија влегла одејќи по железничката пруга која оди крај границата, во близина на село во Рожке во јужна Унгарија.

Тие успеаја да влезат во оваа земја неколку дена пред Унгарија да успее да го доврши ѕидот кој го гради за да го спречи неконтролираното влегување на мигрантите. Ѕидот ќе биде завршен на 31-ви август, според најавата на владата во Будимпешта, а ќе биде висок четири метри и долг 175 километри.

Групата во којашто најбројни се Сиријците, стигнала до преминот кој сé уште не е затворен со ѕидот. Била прифатена од унгарската полиција која ги препратила до блискиот центар за регистрација на мигрантите. Повеќето од нив изјавиле дека дошле директно од границата меѓу Македонија и Грција, пренесува AFP.

Северот на српската покраина Војводина на границата со Унгарија е во исчекување на големиот бран бегалци. Се очекува дека од вторникот на подрачјето на Војводина бројот на пристигнатите мигранти повеќекратно ќе се зголеми, откако македонската полиција и војска во текот на викендот одлучија да ги дозволат нивното масовно минување./крај/мф/сн

Извор: Макфакс