Вкупно пет лица починале од почетокот на годинава во болниците во Босна и Херцеговина од почетокот на годинава како последица на компликации предизвикани од вирусот на свинскиот грип, објавија во петокот тамошните медиуми изнесувајќи го првпат податокот дека, покрај двете пациентки кои починаа оваа седмица, претходно починале уште три пациента на Универзитетскиот клинички центар во Бања Лука.

Началникот на службата за интензивна нега во бањалучкиот клинички центар, Пеѓа Ковачевиќ, потврдил за сараевскиот весник Dnevni avaz дека таму од почетокот на годината се хоспитализирани повеќе пациенти заболени од свински грип, односно заразени со мутираниот вирус од типот AH1N1.

„Примени се и лекувани шеснаесет пациенти со тешки форми на воспаление на белите дробови, од кои тројца починаа, а докажана е инфлуенца AH1N1“, рекол Ковачевиќ.

Според него, починатите припаѓале на ризичните групи, кај коишто по заразата со вирусот на свинскиот грип може да се развијат компликации поради хронични болести или старост. Во болницата во Бања Лука во моментов се лекуваат уште пет пациенти заразени со мутираниот вирус на свинскиот грип, додал.

Претходно седмицава во Клиничкиот центар во Сараево поради компликации предизвикани од зараза со вирусот на свинскиот грип, почина 32-годишна родилка од Витез во деветтиот месец од бременоста, а нејзиното бебе одвај беше спасено. Во четвртокот во болницата во Зеница од свински грип почина и 62-годишна жена, за која се тврди дека била хроничен пациент.

Во БиХ не е прогласена епидемија на грип, а властите тврдат дека нема причина за паника, бидејќи сите смртни случаи се забележани кај лица кои припаѓале на ризичните групи. На населението му се препорачани вообичаените мерки за внимателност, како што е јакнење на имунитетот, засилено одржување на хигиената и избегнување места за јавни собири./крај/мф/сн

Извор: Макфакс