Заменик претседателот на општина Бујановац, Шќиприм Муслију, го тргна српското знаме од јарболот и го подигна знамето на Албанија, пренесуваат српските медиуми.

Според информациите, инцидентот се случил вчера наутро во селото Кончуj, кое инаку се наоѓа на административната линија меѓу Косово и Метохија и централна Србија.

Како што наведуваат медиумите, српското знаме е извадено од јарболот покрај спомен-обележјето на паднатиот член на терористичката ОВК, Фатмир Ибиши, а претходно непознато лице го отстранило знамето на Албанија од истиот јарбол.

pic.twitter.com/8evQXsI87T

— Babica Travica (@BabicaTRAVICA) May 8, 2021

Муслију дури го запрел сообраќајот на автопатот со цел да се сними сето тоа, а видеото наскоро се појави на социјалните мрежи и предизвика бројни реакции кај граѓаните кои побараа итна реакција од државата, пренесува српски „Блиц“.

Дваесет и петгодишен Загребчанец бил фатен со украдени респиратори од Шведска кои сакал да ги препродава, објави „Индекс.хр“.

Момчето е осомничено дека во периодот од 8 март до 2 април 2021 година преку компанија од Косово за компанија со седиште во Загреб, во која тој е директор, набавило 24 медицински респиратори од Шведска во вкупна вредност од 350.000 евра.

„За време на кривичната истрага преку меѓународна соработка, беше потврдено дека респираторите биле украдени во Шведска, односно кражбата била пријавена на 15 февруари 2021 година за време на нивниот транспорт низ Шведска“, соопшти полицијата.

Се сомнева дека тој ја набавил медицинската опрема со намера да ја препродава во трети земји иако знаел или морал да знае дека респираторите се добиени со кривично дело.

Во пресрет на туристичката сезона во Црна Гора здравствените протоколи се финализирани, а Владата донесе одлука за обезбедување болничко лекување на странските туристи што ќе се разболат од Ковид-19 за време на престојот во таа земја да се лекуваат на трошок на Црна Гора.

Министерката за здравство, Јелена Боровиниќ-Бојовиќ, рече дека се обиделе да го поедностават протоколот и дека на туристите ќе им биде објаснето како да се однесуваат ако почувствуваат симптоми на Ковид-19 или доколку се заразат од коронавирус, пренесува „Вјести“.

„Владата донесе одлука туристите што ќе се разболат од Ковид-19 за време на престојот во Црна Гора и ќе бидат хоспитализирани да бидат лекувани на сметка на државата“, рече таа.

ПЦР-тестот, во случај да им треба на туристите за враќање во матичната земја, ќе се изврши непречено во Црна Гора на два паралелни начина – едниот ќе биде организиран со помош на Институтот за јавно здравје на Црна Гора и ќе се изведува бесплатно, а туристите ќе имаат можност да прават тестови и во приватни лаборатории, додаде министерот.

Сите хотелиери ќе треба да одвојат 10 проценти од своите сместувачки капацитети за можни случаи на Ковид-19, најавија официјалните власти.

Мерката за влез во Црна Гора без тест за граѓаните на Србија, Хрватска, БиХ, Русија, Белорусија, Украина и Албанија останува во сила.