Турската полиција спровела во средата рации во канцелариите на медиумската групација Ipek, чии изданија се критични кон претседателот Реџеп Тајип Ердоган, пренесуваат агенциите.

Претресите се спроведени поради обвинувања за неправилности во финансиското работење на медиумската групација Ipek, холдинг компанија поврзана со турскиот исламистички проповедник Фетулах Ѓулен, кој живее во егзил во САД.

Полицијата употребила солзавец и привела повеќе новинари, известува агенцијата DPA. Цел на рацијата била телевизијата Bugun, мала телевизиска мрежа која продолжува со емитување на програмата „во живо“ и покрај мноштвото полицајци распоредени околу нејзината редакција.

Ѓулен порено беше близок сојузник на Ердоган, и се смета дека е заслужен за неговиот подем и доаѓање на власт во 2002 година. Потоа, особено последните години дојде до разидување и заострување на односите, а владејачката Партија на правдата и развојот (AKP) ги обвинува ѓулевистите дека со своите инсталации во судството, полицијата, разузнавачките служби и општеството направиле „држава во држава“.

Во Турција на 1-ви ноември ќе се одржат предвремени парламентарни избори, откако на претходни во јуни првпат по повеќе од деценија AKP не успеа самата да формира влада.

Сите три главни опозициски партии ѝ дадоа поддршка на телевизијата Bugun, и покрај тоа што претходно не се согласуваа со нејзината уредувачка политика, која ја сметаат националистички и исламски ориентирана.

„Кога граѓаните имаат ограничен дијапазон на ставови, особено пред изборите, треба да се јави загриженост“, порача преку Twitter амбасадата на САД во Анкара, во врска со казнувањето на Ipec поради неправилности во трансакции./крај/мф/сн

Извор: Макфакс