Претседателот на Граѓанската иницијатива Србија, демократија, права (СДП) и еден од поранешните политички челници на косовските Срби, Оливер Ивановиќ, прогласен е виновен за воени злосторства во текот на српско-албанскиот судир од 1999/2000 година и пред судот во Косовска Митровица е осуден во четвртокот на девет години затвор.

Оливер Ивановиќ, кој беше уапсен во јануари 2014 година и во притвор мина повеќе од 20 месеци, обвинението го товареше за воено злосторство над цивили во 1999 и во 2000 година. Судот, со кој претседаваше меѓународниот совет на Европската провосудно-полициска мисија Еулекс, ги ослободи четворицата други обвинети, пензионираниот офицер на министерството за внатрешни работи Драгољуб Делибашиќ, адвокатот Илија Вујачиќ, правникот Небојша Вујачиќ и професорот Александар Лазовиќ.

Изрекувањето на пресудата за Ивановиќ и другите обвинети беше проследено со извонредно големи безбедносни мерки во Основниот суд во северниот дел на Косовска Митровица. Ивановиќ го осуди судски совет на Еулекс со кој претседава романската судијка Роксана Комша, а казната му е изречена по обвинението за злосторства од 1999 година дека сторил воено злосторство против цивилното население и поттикнувал на тешко убиство на повеќе Албанци во Митровица. Ивановиќе ослободен од обвинението за кривични дела од февруари 2000 година.

Судијката Комша во пресудата наведува дека српските сили во 1999 година организирале акција за чистење на јужниот дел од Косовска Митровица поради протерување на тамошните Албанци, дека многу албански семејства насила биле исфрлени од своите куќи и станови, а мажите одвојувани од жените и децата. Ивановиќ обвинението го товареше дека во тоа време бил во паравоена единица, облечен во сина униформа и вооружен, како и дека пред девет Албанци на прашањето на еден член од паравоената милиција „што да прават со нив“ (Албанците), одговорил „Што ме прашуваш, постапи по наредбата“.

Ивановиќ, како што тврди романската судијка во образложението на пресудата, бил свесен за последиците од операцијата за протерување и убивање на албанските цивили и „своеволно постапувал знаејќи дека ќе се случат убиства“. Во пресудата, исто така, се наведува дека „не може да се утврди вон секое сомневање“ дека Ивановиќ, спроведувајќи ги тие опишани дејства, постапувал во својство на водач на српските паравојски или водач на српската полиција.

Оливер Ивановиќ, меѓу другото, беше еден од 22-та пратеници на српската коалиција Враќање во парламентот на Косово од 2001 година./крај/мф/мн

Извор: Eulex