Германската канцеларка Ангела Меркел во средата во Белград порачала дека кога се работи за дијалогот меѓу Србија и Косово, Германија е подготвена подготвеноста на српската страна за компромис да ја вреднува преку отворање на пристапните поглавја од преговорите со ЕУ.

По средбата со српскиот премиер Александар Вучиќ, Меркел изјавила дека подготвеноста на Србија за компромис, кога се работи за дијалогот со Приштина, во претходните години не била секогаш изразена, пренесува Танјуг.

„Можете да сметате на поддршка од Берлин. Гледаме дека моментално постои голема подготвеност и компромис од српската страна. Тоа ќе го истакнеме за време на дискусиите внатре во Европската унија. Тоа не било секогаш случај во претходните години, но сега состојбата е таква и ние тоа позитивно ќе го оцениме“, рекла Меркел и порачала дека само прашање на време е кога ќе се случи тоа.

Во рамките на својата балканска турнеја, за време на која германската канцеларка досега ги посети Тирана и Белград, а во четврток ќе престојува во Сараево, таа порачала дека Германија им дава голема поддршка на земјите од регионот во европскиот пат.

Меркел позитивно ги оценила и реформите кои Србија ги направила и порачала дека тие даваат вистински резултат, а проценките на Меѓународниот монетарен фонд (ММФ) водат во таа насока.

„Луѓето мораат да го стегнат каишот, но тие мерки ги даваат и првите резултат, а во тој правец одат и проценките на ММФ“, рекла Меркел и додала дека српската економија работи на добра основа.

Српскиот премиер Вучиќ пак, изјавил дека Меркел е секогаш еден од најзначајните гости, и дека посебно сака да и се заблагодари за нејзиниот придонес во политиката на мирот и добрите односи на Балканот.

„Ние од Германија не бараме милост, туку помош и знаеше за да бидеме вредни, а во економијата да бидеме уште поуспешни“, ркеол Вучиќ, додавајќи дека посетата на Меркел е голема чест и голем и важен ден за Србија.

„Сакам да и се заблагодарам на госпоѓата  Меркел, која на некој начин беше столб на стабилност за сите нас и поради тоа што кога имавме проблеми најде начин за да ни помогне. И не ми е срам да го кажам тоа, па и денес Германија води грижа за Србија и ние поради тоа сме благодарни“, рекол Вучиќ.

Меркел и Вучиќ исто така разговарале и околу тоа дека Србија е одлучна за да го продолжи својот пат во европските интеграции и дека на тој пат очекува голема поддршка.

Меркел исто така оценила дека Србија се наоѓа пред голем предизвик поради проблемите со мигрантите и дека во ЕУ се водат дискусии околу ова, но и за тоа дека поради бранот на бегалци не треба да се градат ѕидови, алудирајќи на одлуката на Унгарија да изгради ѕид на границата со Србија.

„Мометалниот режим кој го имаме во Европа веќе не функционира“, рекла Меркел, наведувајќи дека најголем број од мигрантите пристигнуваат во Србија преку Грција од Сирија, и дека Србија станала транзитна земја.

„И во ЕУ се водат дискусии околу ова, никого нема да оставиме сам“, додала германската канцеларка./крај/мф/бс