Припадничка на забранетата Работничка партија на Курдистан (PKK) е една од двајцата осомничени извршители на бомбашкиот напад од неделата вечерта во центарот на турската престолнина Анкара во кој загинаа 37 лица, соопштија во понеделникот безбедносни извори на Турција која прогласи полициски час во југоисточниот курдски дел од земјата и започна поинтензивни бомбардирања на позициите на курдските герилци во земјата и во северен Ирак.

Нападот изведен во неделата навечер со автомобил бомба кој експлодирал меѓу два автобуса недалеку од зградата на министерствата за правда и за внатрешни работи и една од канцелариите на премиерот, е втор ваков напад во центарот на турската престолнина во последните месец дена. Тогаш во нападот со автомобил бомба во центарот на Анкара во близина на штаб на турската армија загинаа 29 луѓе, најмногу високи офицери кои се превезуваа со воени автобуси.Според турското министерство за здравство, во неделниот атентат загинале 37 луѓе, меѓу кои најмалку еден терорист, а ранети се 125 луѓе, од кои 71 се задржани на болничко лекување а меѓу нив повеќе од десет се во критична состојба.Според турските медиуми, кои пренесуваат извори од истрагата, пронајдени се докази дека еден од бомбашите била членка на PKK, според отпечатоците на палците идентификувана како Сехер Чагла Демир, родена 1992 година во курдскиот град Карс. Таа претходно била ставена под полициски надзор во врска со членство во забранетата курдска организација и пропагандана терористичка активност, била изведена на суд но во недостиг од докази била ослободена. Според турски безбедносни извори, Демир ѝ се придружила на PKK во 2013 година.PKK во својата борба досега директно ги напаѓаше само турските безбедносни сили и истакнува дека не напаѓа цивили. Се коментира дека доколку сега би ја преземал одговорноста за овој напад, тоа би значело дека курдските герилци ја промениле тактиката. Истовремено претставникот на Националниот конгрес на Курдистан во Москва, Салахатин Соро изјави за агенцијата РИА дека PKK нема поврзаност со атентатот во Анкара, бидејќи во него не се за забележува „нејзиниот ракопис“. Меѓутоа, предупредува дека Турција може да го искористи нападот за да оправда воени интервенции во соседните земји каде што, исто така, има големи курдски заедници, како северните делови на Иран и на Сирија.Милитантите од малата курдска група Јастреби за слободата на Курдистан (ТАК), порано поврзана со забранетата во Турција Работничка партија на Курдистан (PKK) ја презема одговорноста за експлозијата која одекна на 23-ти декември на аеродром во Истанбул во која загина едно лице, како одмазда за операцијата на турската армија во курдскиот југоисток за земјата. Истата ултрарадикална група, за која турските власти сметаат дека и натаму е поврзана со PKK, ја презема и одговорноста за претходниот напад со автомобил бомба од 17-ти февруари извршен неколку улици подалеку од неделниот.По нападот во Анкара, турските борбени авиони во понеделникот утрото ги нападнаа камповите на PKK во северен Ирак. Единаесет борбени авиони учествувале во воздушните удари во областа Кандил, во планините на крајниот север од Ирак, каде што постојат сомневања дека се вкопани челниците на PKK, која САД и ЕУ, исто така, ја ставија на листата терористички организации.Прогласен е и полициски час во југоисточниот град Сирнак, поради воени операции кои се водат во самиот град изминатите месеци, во кој според курдски и некои турски извори имало и многу цивилни жртви./крај/мф/сн

Извор: Макфакс