Регион
Путин до Србија: Имаме заедничко минато и добра иднина

Српскиот претседател Томислав Николиќ во четвртокот по разговорите со рускиот претседател Владимир Путин во Белград порача дека Србија во Русија гледа искрен и вистински пријател и дека помошта на оваа земја е драгоцена за зачувувањето на територијалниот интегритет и суверенитет, особено кога станува станува збор за Косово и Метохија, пренесува Танјуг.
Рускиот претседател, кој престојува во Белград по повод одбележувањето на 70-годишнината од ослободувањето на Белград и победата на фашизмот, порачал дека двете земји имаат заедничко минато и добра иднина.
„Знам дека тој пристап го чувате, иако можеби можевте и поинаку“, изјавил Николиќ на почетокот на состанокот, додавајќи дека Србија во Русија гледа свој голем сојузник, соработник и партнер, и дека нема да го загрози својот морал преку какво и да е лошо однесување кон Русија.
Николиќ додал дека Србија денес нема непријател, туку дека има помали и поголеми пријатели, повторувајќи дека во Русија гледа голем пријател.
„Србија на овој начин покажува дека размислува онака како што размислувале и нашите предци и ги учеле своите деца да ја сакаат Русија. Нас нè поврзува сè, не само заедничкото словенско потекло, јазикот, верата, традицијата, културата, туку и тоа што секогаш сме биле на иста страна“, истакнал српскиот претседател.
Рускиот претседател порачал дека двете држави имаат многу заеднички нешта од минатото, но и дека пред себе имаат добра иднина. Тој потсетил дека пред 70 години беа водени борби за ослободување на Белград, оценувајќи дека тоа било „заедничка борба за вистинска работа“.
Кога се работи за Косово, чија независност Русија не ја признава, Путин нагласил дека официјална Москва тука зазема принципиелен став кој не се заснова само на пријателските односи, туку и на меѓународното право.
„Тоа е принципиелен став кој нема да подлегне на никакви промени. Ја поддржуваме Србија и имаме намера ова да го правиме и во иднина“, рекол Путин.
Тој оценил дека трговско-економските односи меѓу двете земји имаат тенденција за раст, но дека можат да бидат уште подобри и изразил надеж дека за време на разговорите со српските официјални лица ќе бидат пронајдени и дополнителни причини за натамошна соработка.
По слетувањето во Белград, двајцата претседатели се упатија на гробиштата на Ослободителите на Белград, каде положија цвеќе, а потоа се запишаа и во спомен-книгата.
„Секогаш внимателно ќе се сеќаваме на советски и југословенските војници кои ги дадоа своите животи за мир во Европа, сето тоа го паметиме, и тоа е подвиг кој овозможи да се доближи нашата заедничка победа. Се поклонуваме пред нивното јунаштво и пожртвуваноста“, напиша Путин во спомен-книгата.
Путин потоа пред Палатата „Србија“ беше дочекан од српската претседателка на Собранието Маја Гојковиќ, српскиот премиерот Александар Вучиќ и министрите во српската влада.
Српскиот претседател Николиќ потоа на Путин му додели орден за извонредни заслуги во развивањето и зацврстувањето на пријателските односи меѓу Србија и Русија.
Путин оствари и средба со српскиот премиер Александар Вучиќ, кој ја искористи приликата да го замоли рускиот претседател да овозможи увоз на „Фиат“, кој се произведува во Крагујевац.
„Јас денес ќе ја искористам оваа прилика за да ве замолам за нешто. Вие знаете дека во Србија произведуваме „Фијат“, тоа е наш автомобил направен во Крагујевац, и доколку можете, би сакале да овозможите увоз на овие возила во Руската Федерација“, рече Вучиќ.
За време на посетата на Путин двете страни ќе потпишат и повеќе меѓународни договори од областите на развојот на воено-техничката соработка, енергетика и железнички сообраќај./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Грција го усвои контроверзниот закон – отворен патот за 13-часовно работно време

Грчкиот парламент денес го усвои новиот закон за труд, кој предизвика бурни реакции и протести во целата земја. Со 158 гласа „за“ и 109 „против“ владиниот предлог беше изгласан, а левичарската опозициска партија СИРИЗА одби да учествува во гласањето.
Законот, кој според владата има цел да го направи пазарот на труд поприспособлив и поефикасен, им овозможува на работодавците во приватниот сектор да бараат од своите вработени да работат до 13 часа дневно наместо досегашните осум. Продолженото работно време може да се применува најмногу 37 дена годишно, а работниците се заштитени од отказ доколку одбијат да работат прекувремено.
Владата тврди дека со новите правила се зголемуваат флексибилноста и заштитата на работниците, особено оние со семејства, и дека законот дозволува четиридневна работна недела доколку има претходен договор меѓу работодавецот и вработениот.
Меѓутоа, синдикатите и опозицијата остро реагираа предупредувајќи дека реформата ја укинува суштината на осумчасовниот работен ден и ја легализира прекумерната експлоатација. Синдикатот на државните службеници ADEDY порача дека „флексибилното работно време во пракса значи уништување на семејниот и на општествениот живот и укинување на работничките права“.
Синдикатите потсетуваат и дека просечните плати во Грција се значително пониски од европскиот просек, а нерегистрираниот труд и натаму е голем проблем. Опозициските партии оценија дека законот е застарен и спротивен на европските тенденции за скратување на работното време и воведување пократка, но поквалитетна работна недела.
Новите одредби предвидуваат и поголема флексибилност при вработувања на определено време, со цел, како што наведува Министерството за труд, да се стимулираат продуктивноста и модернизацијата на пазарот на труд.
И покрај уверувањата на владата дека законот ќе ги заштити работниците и ќе овозможи подобра рамнотежа меѓу работа и приватен живот, јавноста останува поделена.
Регион
Вулин до фон дер Лајен: Побрзо ќе ја прифатите Турција во ЕУ отколку Србија да ја предаде Русија

Александар Вулин, кој во минатото извршуваше голем број важни функции во Србија, ги коментираше изјавите дадени од претседателката на Европската комисија, Урсула фон дер Лајен, за време на нејзината посета на Белград.
„Очекувам Европската Унија целосно да се усогласи со политиката на Србија, вклучително и повлекување на признавањето на таканареченото Косово, како и итно повлекување на сите одлуки што го кршат Дејтонскиот договор и ги намалуваат овластувањата на Република Српска. Госпоѓо фон дер Лајен, никој не нè праша дали сакаме да се впуштиме во авантурата за приклучување кон Европската Унија, но ви гарантирам дека ќе најдеме начин да ја прашаме Србија што мисли за продолжување на авантурата. И да не заборавам, попрво вие ќе ја примите Турција во Европската Унија отколку Србија да ја предаде Русија“, рече Вулин, пренесува „Телеграф“.
Фон дер Лајен разговараше со српскиот претседател Александар Вучиќ во Белград. На заедничката прес-конференција таа рече дека очекува Србија „да го започне својот пат кон Европската Унија двапати побрзо“.
„Нашите позиции се јасни и вклучуваат слобода, а не репресија, вклучително и право на мирно собирање, партнерство, а не потчинување, дипломатија, а не агресија“, нагласи фон дер Лајен, оценувајќи дека „сега е вистинското време Србија да преземе чекори кон пристапување“.
„Вреди да се вложи овој напор бидејќи се приближувате до целта. Потребно е да се забрзаат реформите во владеењето на правото, електронските медиуми, изборните закони и хармонизацијата со надворешната политика на Европската Унија“, изјави таа, истакнувајќи дека овие реформи бараат упорност, трпение, учество на сите сегменти од општеството и политичкиот спектар.
Регион
Вучиќ: Ова ќе биде тешка политичка зима за нас; Фон дер Лајен: Сметајте на ЕУ

Српскиот претседател Александар Вучиќ и претседателката на Европската комисија, Урсула фон дер Лајен, се обратија на јавноста по тет-а-тет средбата во Белград и одговорија на прашања од новинарите.
„Особено ми е драго што имавме можност да бидеме домаќини на претседателката на Европската комисија. Особено сум ѝ благодарен бидејќи таа дојде на територијата на Србија во неколку наврати, не само во нејзиниот главен град. За Србија, членството во ЕУ е стратешка определба и приоритет на надворешната политика. И тоа нема да се промени. Не сме отвориле ниту едно поглавје, ниту еден кластер од почетокот на конфликтот во Украина. Верувам дека она што е направено во однос на регулаторните агенции, избирачките списоци, ќе наиде на позитивна оценка. Сега се соочуваме со тешка ситуација. НИС е под американски санкции, а де факто е и под европски санкции.
Се надевам дека ќе ги имаме поддршката и помошта од ЕУ. Се надевам дека ЕК ќе најде начин да им олесни на земјите кандидатки. Обезбедивме доволни количини нафта и гас.
„Ќе биде тешка политичка зима за нас, во овој поглед ќе соработуваме тесно со луѓе од Европската Унија“, рече Вучиќ.
„Не дадовме многу оптимистички изјави за пристапувањето кон ЕУ.“ Денес не можам ништо да ветам, освен дека ќе работиме напорно и ќе се жртвуваме и се надевам дека ќе ја имаме поддршката од ЕУ за сето ова и дека ќе нè слушнат во Брисел. Не е толку едноставно. Знаете кои се двете клучни прашања за нас“, рече Вучиќ.
Тој рече дека разговарале и за зачувување на мирот и стабилноста во регионот, за дијалогот меѓу Белград и Приштина.
„Ќе кажам дека за танго се потребни двајца“, рече Вучиќ.
Претседателката на Европската комисија, Урсула фон дер Лајен, рече дека Србија може да продолжи да смета на Европската Унија.
„Србија го направи изборот да се приклучи на ЕУ и очекуваме Србија да го продолжи својот пат двојно побргу. Земете ја како пример енергетската криза во 2022 година, која имаше драстичен ефект и ние се соочивме со неа. Можете да продолжите да сметате на нас“, рече Фон дер Лајен и продолжи:
„Ја поврзуваме Србија со пазарот на енергија. Ја поканивме Србија да се приклучи на механизмот на ЕУ за набавка на гас. Треба да видиме напредок во областа на владеењето на правото, електронските медиуми. Сакам да го поздравам напредокот во врска со избирачките списоци и РЕМ. Би ве поканила да дојдете во Брисел за еден месец за да видите како стојат работите. Морам да ве пофалам за 61-процентно усогласување на надворешната политика со ЕУ. Како дел од планот за раст, формиравте надзорен комитет. Мислам дека тоа е одличен сигнал“.
На прашањето каде го гледа решението за моментната политичка ситуација во Србија, Фон дер Лајен вели:
„Ова е секако клучен момент за Србија. Време е целата нација да се обедини. ЕУ е подготвена да ве поддржи, целиот процес на пристапување е за тоа. Секој треба да учествува во процесот на реформи. Владата соработуваше со организациите на граѓанското општество. Медиумите и изборната реформа се нешто што ги интересира сите. Имплементацијата е најважна“.
Фото: принтскрин