Регион
Рама: Албанија и Србија се клучни за мир во регионот
Премиерите на Србија и Албанија, Александар Вучиќ и Еди Рама во Тирана ја завршија средбата во четири очи, а домаќинот Рама по средбата порача дека двете земји се клучни за мирот во регионот.
„Тоа што имаме различни ставови околу некои работи не значи дека не сме свесни за фактите дека двете земји се клучни за мирот во регионот“, изјавил Рама, пренесува Б92.
Рама исто така истакнал дека Косово и понатаму е важна тема во односите меѓу Србија и Албанија. Албанскиот премиер навел дека го цени дијалогот меѓу Белград и Приштина и дека на него гледа како на карта за отворање на ново поглавје во односите меѓу Србија и Албанија.
„Верувам дека овие 24 часа кои премиерот на Србија ќе ги помине во Тирана ќе бидат иницијатива граѓаните на Србија во иднина почесто да доаѓаат во Албанија, особено за време на престојното лето. Ние сме мали и заедно мораме да вложиме напори за да ја подобриме нашата економија“, рекол Рама.
Тој додал дека им се нуди можност на Албанците и Србите, за доброто на своите земји и целиот регион да го направат она што Германците го направија за себе после Втората светска војна.
Рама додал дека верува оти двете земји заедно ќе успеат да ги унапредат односите и да ја спроведат агендата за регион без граници, што ќе придонесе за отфрлање на бариерите во трговијата, културата и науката.
„Се надевам дека заедно ќе успееме да одиме далеку на патот кон ЕУ. Имаме многу заеднички работи што можат да придонесат за напредокот на нашите земји“, рекол албанскиот премиер.
Српскиот премиер Вучиќ во средата во Тирана беше дочекан со највисоки државни почести, а по церемонијата оствари средба со Рама, која траеше околу еден час.
Историската посета на српскиот премиер во Албанија започна со интонирањето на српската химна „Боже правда“, со развиорено српско знаме, а Вучиќ претодно на аеродромот беше дочекан од страна на албанскиот вицепремиер Нико Пељеси.
Поради посетата на српскиот премиер Тирана е целосно блокирана, а возилото во кое биле Вучиќ и српската делегација било спроведено од аеродромот низ градот под високо мерки на безбедност и следено во воени хеликоптери, а на секои 50 метри има и полицајци, јавува Б92./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.