Русија се сомнева дека преку Босна и Херцеговина на рускиот пазар се пласираат производи кои се по потекло од Европската унија чиј увоз е забранет како одговор на санкциите што ги воведе Брисел против Москва поради кризата во Украина и од властите во Сараево бара појаснување на бројките коишто покажуваат огромно зголемување на босанскиот извоз, пренесуваат во вторникот сараевските медиуми.

Руската служба за ветеринарен и фитосанитарен надзор Роселхознадзор претходно со писмо ја предупреди амбасадата на Босна и Херцеговина, како и на Македонија, а особено на БиХ дека податоците од руската царинска служба потврдуваат дека во споредба со минатата 2013 година увозот прехранбени и земјоделски произвдои од БиХ во Русија е зголемен дури за трипати.

Овој податок минатата седмица беше објавен и во руските медиуми, со забелешка дека постојат сомневања дека БиХ всушност прави реекспорт на храната произведена во ЕУ, чиј увоз во Русија е забранет.

Поточно, во првите девет месеца од 2013 година, БиХ во Русија извезла 1.14 тони земјоделски производи, а во првите девет месеци од оваа 2014 година извозот изнесувал 3.123 тони. Така, на пример, досега годинава босанските извозници на рускиот пазар пласирале 389 тони грозје, додека во целата мината година тој извоз изнесувал 68 тони. Слични несразмерни податоци се забележани и во извозот на јаболка.

Руските власти сега од БиХ бараат итен одговор за тоа колку во БиХ се произведуваат одредени земјоделски производи и на кои површини. Тоа, особено се однесува на јаболката, крушките, компирите и грозјето.

Земјоделците во БиХ се загрижени, бидејќи сметаат дека сега Русија може да воведе трговски санкции и за нивната земја. „Стравуваме од забраната за увоз од БиХ во Русија и на тоа предупредувавме, бидејќи се знаеше дека, откако Русија воведе санкции за ЕУ, ќе дојде до притисок врз БиХ во смисла преку неа да се извезува во Русија, изјави за бањалучкиот дневен весник Независне новине, Драгоја Дојчиновиќ, претседател на Здружението на овоштарите.

Дојчиновиќ, исто така, се сомнева дека преку БиХ на рускиот пазар се пласираат производи од ЕУ, но вината ја гледа во посредниците. „Тоа не го прават произведувачите, туку мешетарите и тајкуните кои го искористија моментот и веројатно увезуваат и прават реекспорт“, додава.

Министерството за надворешна трговија и економски односи на БиХ се уште не се огласи за предупредувањата од Москва, Од Управата за недиректно оданочување,на БиХ (УНО), пак, најавија дека доколку има потреба ќе спроведат посебна анализа на извозот за Русија. Во оваа управа веќе располагале со податокот дека оваа година во Русија од БиХ биле извезени 94 тони компири, додека ланската година не бил извезени ниту тон. На руските пазари од БиХ од јануари до октомври 2014 година им биле продадени повеќе од 2.000 тони јаболка, а минатата 2013 година само 10 тони јаболка./крај/мф/сн

Извор: Макфакс