Американскиот помошник државен секретар Викторија Нуланд следната недела ќе престојува во посета на Бугарија, а тамошните дипломати очекуваат ова би можело да биде и најава за позитивни чекори околу решавањето на визниот режим со САД, пренесуваат бугарските медиуми.

Според бугарските медиуми, американски конгресмени и сенатори имаат подготвено проект за промена на правилата за доделувањето на безвизниот режим, односно влегување во т.н. „виза вејвер“ програма.

Сегашниот критериум е во соодветната држава негативниот одговор на барањата за американски визи да биде под 3 проценти. Според новата идеја претставена во Вашингтон, пак, доделувањето на безвизен режим би се поврзало со процентот на оние кои во САД останале по истекувањето на визата. Доколку дојде во ваква промена, тоа ќе биде во корист на Бугарија, бидејќи сегашнипт процент на одбиени за виза изнесува помеѓу 13 и 15 проценти, пишуваат бугарските медиуми.

Прашањето со визите повторно ќе биде поставено за време на посетата на Нуланд на Софија, каде таа ќе има средби со претставници на бугарската влада и со претседателот Росен Плевнелиев. Нуланд со бугарските власти се очекува да разговара за енергетската безбедност и диверсификација на енергетските избори во регионот, модернизација на одбраната, како и напорите за реформите.

Нуланд е највисокиот државен службеник на САД задолжен за Европа и Евроазија, и е на турнеја во регионот во моменти кога во САД се разгорува дебатата за визната и имиграциона политика.

Бугарските медиуми додаваат дека дури и да биде прифатен предлогот на конгресмените и сенаторите за промена на критериумот за доделување на безвизниот режим, темпото со кое се случуваат работите значи дека за Бугарија овој процес би можел да потрае со години. Во преостанатите земји-членки на ЕУ кои се уште не се дел од „виза вејвер“ програмата, покрај Бугарија уште се и Романија, Полска, Кипар и Хрватска./крај/мф/бс