САД сакат Грција да се концентрира на проектот за гасоводот кој го поддржува Западот а не на ривалскиот руски проект за кој Атина разговара со Русија, изјави во петокот американскиот функционер задолжен за енергетика по средбата со грчките функционери во Атина, кои одговорија дека ќе продолжат да преговараат со Москва.

Грција, на којашто ѝ се заканува банкрот, по победата на владата на крајната левица започна да се отвора кон Русија и Кина во обидот да дојде до свежи пари. Владата во Атина навести дека Москва ја разгледува можноста однапред да ѝ плати за транспортот на природен гас преку гасоводот Турски тек, со кој рускиот гас би бил испорачува во Европа преку Грција, откако Русија во декември минатата година објави дека го запира проектот Јужен тек кој наиде на многу правни пречки од страна на Европската унија.

САД, меѓутоа, сакаат Грција да се посвети на Трансјадранскиот гасовод (TАP), со кој од Азербејџан би се транспортирал гасот во Европа, преку Турција, Грција, Албанија и Јадранското Море.

„Се согласивме околу тоа дека е важно да се концентрира на проектите коишто денес се на масата, а тоа е TAP. Тој е денес на масата за Грција. Турскиот тек не постои. Не постои ниту конзорциум за изградба, не постои договор за изградба. Затоа да го оставиме тоа настрана и да сочекаме додека нешто не се случи по ова прашање и да видиме дали е релевантно или не. Во меѓувреме, да се концентрираме на она што е важно, гасоводот околу кој веќе се договоривме, вклучително и Грција, изјави во петокот Амос Хохштајн, специјален американски претставник за енергетски прашања“

Меѓутоа, грчкиот министер за енергетика, Панајотис Лафазанис, застапник на владината фракција којшто сака зајакнување на односите со Русија, по средбата со Хохштајн соопшти дека Грција ќе продолжи да го поддржува проектот Турски тек. „Го поддржуваме тој проект, бидејќи веруваме дека ќе биде од полза за нашата земја“, додаде Лафазанис.

Проектот „Турски тек“ предвидува изградба на гасовод со моќност од 63 милијарди кубни метри гас годишно, исто обем како и напуштениот проект „Јужен тек“, од Русија во Турција преку Црното Море. Цевководот во должина од 1.100 километри ќе се состои од четири фази, и до турско-грчката граница ќе донесе до 47 милијарди кубни метри гас. Се планира дека на границата меѓу Турција и Грција да се изгради гасоводен хаб, а земјите од ЕУ заинтересирани за учество во гасоводот ќе треба самостојно да го реализираат капацитетот за натамошен транспорт и прием на гасот на својата територија.

Некои до балканските земји се надеваат дека ќе можат да се приклучат на TANAP преку Трансјадранскиот гасовод (TAP) кој ќе го транспортира гасот преку Албанија до Италија. Босна и Херцеговина, Црна Гора и Хрватска, пак, имаат намера да го градат Јонско-јадранскиот гасовод (IAP), кој имаат желба да се приклучи на TAP во албанското место Фиер./крај/мф/сн

Извор: Reuters