Грчкиот премиер Антонис Самарас ги предупреди во саботата пратениците на опасноста од предвремените парламентарни избори доколку неговиот кандидат за претседател на земјата не ја добие поддршката и во третото гласање следната седмица во парламентот, но изрази убедување дека Ставрос Димас ќе биде избран.

Зборувајќи пред одржувањето на третиот и последниот круг од гласањето во парламентот за наследникот на претседателот Каролос Папуљас во понеделник, премиерот Антонис Самарас изјави дека парламентарните избори, коишто мора да бидат распишани доколку не може да се именува нов претседател, се против националните интереси.

Најновите истражувања на јавното мнение покажаа дека владејачката коалиција на конзервативците од Нова демократија на Самарас и на социјалистите од Пасок, иако последните денови ја намали разликата сепак уште заостанува зад коалицијата на радикалната левица Сириза којашто најавува дека доколку дојде на власт повторно ќе преговара за меѓународната финансиска помош за Грција и ќе ги отфрли строгите мерки за штедење кои се спроведуваат последните години како услов да се добие пакетот странска пакет помош.

Самарас рече дека планот на Сириза да го отповика договорот за помош од милијарди евра би бил катастрофален за стабилноста на Грција. Инаку, следните парламентарни избори треба да се одржат во 2016 година.

„Грчкиот народ не сака предвремени избори. Правев и правам се’ за да осигурам претседателот да биде избран, а предвремените парламентарни избори избегнати“, изјави Самарас во интервјуто за државната телевизија. Ја обвини Сириза за „политичка уцена“ и рече дека таа би ја довела Грција во конфликт со нејзините кредитори.

Изјавата на Самарас доаѓа речиси истовремено кога германскиот министер за финансии Волфганг Шојбле во Берлин предупреди дека секоја влада на Грција мора да ги почитува обврските коишто Атина ги прифати. Бескомпромисниот тон на Самарас навестува дека најверојатно веќе гледа преку гласањето во парламентот во понеделник кон предизборна кампања.

„Доколку дојде до избори ќе победиме, го чувствувам тоа. Не верувам дека грчкиот народ ќе прифати со лесните ветувања да биде воден назад до работ на амбисот каде што беше пред две ипол години. Иако изборите би ми одговарале, сакам бродот сигурно да доплови во пристаништето“, рече Самарас.

Испитувањето на јавното мнение на институтот Alco објавено во саботата дека Сириза има предноста во однос на Нова демократија од 3,3 отсто, што е малку помалку отколку во претходната анкета. Доколку изборите би се одржале сега, Сириза би добила 28,3 отсто, а Нова демократија 25 отсто од гласовите.

Шансите на Самарас, меѓутоа, ги комплицираат слабите резултати на другите партии. Коалицискиот партнер Пасок е соочен со сериозни внатрешно партиски тензии и може да се подели и нема да влезе во парламентот, што би го оневозможило формирањето на стабилно коалициско мнозинство./крај/мф/сн

Извор: Макфакс