Лидерот на Српската радикална партија, Воислав Шешељ, кој е пуштен на привремена слобода од Хашкиот трибунал каде во притвор помина речиси 12 години, во среда се очекува да пристигне во Белград.

На аеродромот се очекува да го пречекаат семејството и најтесното партиско раководство. Во „одборот за дочек“ нема да има претставници на Владата на Србија, ниту на Националниот совет за соработка со Хашкиот трибунал. Улогата на државата во овој случај се сведе на давање на условни гаранции, на коишто Хаг на крајот не му посвети внимание, како и на купување на авионски билет во еден правец, по цена од 150 евра. На аеродромот нема да се одржи митинг, меѓутоа за секој случај ангажирано е обезбедување за да биде спречен било каков инцидент.„Митинг за добредојде ќе организираме во сабота во 12 часот на Плоштадот на републиката“ изјави заменик претседателот на СРП, Немања Шаровиќ.Лидерот на радикалите кој е ослабен 27 килограми ќе биде подложен на лекарски прегледи за да се констатира неговата здравствена состојба. Судскиот совет на Хашкиот трибунал на 6 ноември донесе одлука Воислав Шешељ да биде привремено пуштен на слобода, а Владата претходно до трибуналот доставија условни гаранции за негово пуштање.Шешељ во Хашкиот трибунал, во притворската единица на трибуналот помина повеќе од 11 и пол години. Лидерот на српските радикали е обвинет за бројни воени злосторства, а обвинението против него е подигнато на 14 февруари 2003 година, а во притворот на Меѓународниот суд е префрлен на 24 февруари истата година. Судењето почна четири години покасно, на 7 ноември 2007 година, а пресудата сеуште не е донесена./крај/тј/бл