Во Загреб во петок е склучен првиот геј брак или како што се нарекува „животно партнерство“, објави организацијата Zagreb Pride на нивната Facebook страна, пренесува порталот Index.hr.

„Среќно и сè најдобро на двајцата младоженци од Zagreb Pride“, им посакала организацијата, со фотографија од првиот документ за животно партнерство со текст: „Во Хрватска вечерва е создадена историјата, еве како изгледа првиот документ за склопување животно партнерство“.

Повеќе детали за првиот геј брак во Хрватска за сега не се познати. Според информации на Index.hr станува збор за мала церемонија само за семејството, но како што дознава порталот на венчавката присуствувал и министерот за администрација, Арсен Баук,  кој им подарил две кравати на младоженците.

„Точно е. Во име на Република Хрватска им подарив две кравати. Тоа е симболичен подарок на првата двојка која склопи животно партнерство“, рекол министерот за Index.hr и открил дека до сега примиле 17 барања од различни делови од Хрватска за склопување животно партнерство, а најмногу од Загреб.

На 15-ти јули хрватскиот Сабор го усвои Законот за животно партнерство кое е дефинирано како заедница за семеен живот на две лица од ист пол.

Можност за склопување на геј бракови во Хрватска имаат и странци.крај/мф/сд