На границата меѓу Србија и Македонија се спроведуваат мерки коишто ги применуваат и другите земји на ткн балканска рута, а Србија и натаму ќе се однесува одговорно и согласно со меѓународното јавно и хуманитарно право, истовремено штитејќи ги своите национални интереси, порачаа во средата од Белград.

Повеќе од 400 мигранти се заглавени на Табановце, на ничија територија, на македонско-српската граница. Мигрантите ниту се пропуштаат во Србија, ниту се враќаат назад во Македонија, а причината за македонските власти беше непозната, бидејќи македонската полиција нема одговор од српските власти. Од друга страна, илјадници мигранти чекаат од Грција да влезат во Македонија, и неизвесно е што ќе се случува имајќи предвид дека членките на ЕУ на самитот за мигрантската криза соопштија дека балканската рута веќе не постои.

Српскиот премиер Александар Вучиќ во средата вечерта истакна дека „Србија нема да биде паркинг или собирен центар за бегалците“, како и дека кон бегалците кои останале на нејзината територија по затворањето на балканската рута ќе се „однесува хумано и согласно законот“. Во врска со затворањето на ткн балканска мигрантска рута, Вучиќ истакна дека Србија се однесува согласно одлуките кои на теренот ги применуваат Германија, Австрија, Словенија и Хрватска, а „така ќе се однесува и во иднина“.

Претходно во текот на денот српскиот министер за труд и социјална грижа Александар Вулин рече дека Србија во примана на своите мерки ќе ги следи земјите на балканската рута, како и дека од полноќ веќе се применуваат мерки кои ги применуваат Словенија и Хрватска.

„Како што се однесуваат Словенија и Хрватска, така ќе се однесуваме и ние. Од полноќ нашата влада започна да ги применува одлуките кои ги применуваат другите земји на рутата. Тоа значи дека нашата граница кон Македонија и кон Бугарија ќе функционира согласно правилата кои за мигрантите ги воспоставија Хрватска и Словенија“, изјави Вулин за новинарите.

Србија внимателно го следи развојот на настаните по должината на мигрантската рута, а Вулин оцени дека „ситуацијата во Идомени во Грција и на грчко-македонската граница е многу загрижувачка, поради големиот број мигранти“.

Македонските власти, исто така, соопштија дека нема да ги пропуштаат мигрантите преку границата кон Грција, откако одлуката за заострување на пропуштањето започна да ја применува Словенија, како и Хрватска и Србија. Според процените, од грчката страна на македонско-грачката граница во моментов има повеќе од 13.000 лица.

Шефот на претставништвото на УНХЦР во Србија, Ханс Фридрих Шредер изјави за агенцијата Танјуг дека во Србија, по затворањето на балканската рута, останале меѓу 1.500 и 2.000 бегалци. „Бројот на бегалците во Србија од Сирија, Авганистан, Ирак е ограничен не зборуваме за илјадници луѓе“, рече Шредер.

Според него, една од можностите е тие да добијат бегалски статус во Србија, или, доколку го сакаат тоа, и доколку е можно, да се вратат во земјите на потеклото или да им се овозможи програмата за спојување на семејствата со кои се раздвоиле по патот./крај/мф/сн

Извор: Макфакс