Регион
Српското обвинителство бара од Нигерија изјава на лекар за трговија со органи на Косово
Српското обвинителство за воени злосторства за побарало во вторникот до Нигерија да го сослуша лекарот Филип Њ’манзе за сознанијата коишто тој ги има за трговијата со човечки органи за кои во медиумите ги обвини поранешниот косовски премиер Хашим Тачи и нигерискиот богаташ Рохас Окороша, соопштија во Белград во четвртокот.
„Обвинителството за воени злосторства на Република Србија упати денеска до надлежните служби на Сојузна Република Нигерија барање за разговор со др Филип Њ’манзе, лекарот кој изјави дека Хашим Тачи заедно со Рохас Окороша тргувал со органите на грабнатите Срби на Косово и Метохија“, се наведува во соопштението на српското обвинителството.
Според одредбите Законот за меѓународна правна помош, Обвинителството со посредство на српското министерство за правосудство „започна постапка која ќе овозможи сослушување на лица кои имаат евентуални сознанија за трговија со човечки органи на Косово и Метохија и на северот од Албанија“.
Во овој предмет, како што се наведува во соопштението, Обвинителството досега сослушало 160 сведоци. Се додава дека „на овој предмет се одвива интензивна соработка со Специјалниот истражен тим (на правосудната мисија на ЕУ на Косово) Еулекс кој, со поддршка на институциите на Република Србија, сослушал повеќе од 200 сведоци на просторот на Србија“.
„Специјалниот истражен тима спроведува истрага во повеќе земји за злосторствата на Ослободителна војска на Косово (ОВК – УЧК) на Косово и Метохија во периодот од 1998 до 2000 година, што епилог ќе добие пред неодамна формираниот Суд за ОВК во Хаг“, наведува српското Обвинителство за воени злосторства.
Здружението на лекарите на Нигерија го обвини Рошас Окороша, милијардер и гувернер на нигериската сојузна држава Имо, дека организирал мрежа за трговијата со човечките органи во Нигерија, во соработка со поранешниот премиер и актуелен министер за надворешни работи Хашим Тачи, но наводно и со неименувани функционери од Турција и од Хрватска, објави нигериската информативна агенција Naij, а веста беше пренесена во белградски Блиц и други медиуми во регионот, како и во лондонски The Independent.
Известувачот на Советот на Европа, Дик Марти, во својот извештај од 2010 година наведе тешки обвинувања против командантите на ОВК, вклучително и за тогашниот косовски премиер Хашим Тачи, дека биле вклучени во илегално тргување со човечки органи замени од страна на „диви хирурзи“ грабнатите Срби на Косово и во северна Албанија, во текот на косовскиот конфликт.
Освен Марти, овие тешки обвинувања ги повтори и поранешниот шеф на мисијата на УНМИК на северот од Косово, Жерар Галучи, наведувајќи дека САД, Велика Британија, Германија, Франција и Италија „многу добро биле информирани за криумчарењето на човечки органи“ и за 2црната хирургија на којашто биле изложени грабнатите Срби на Косово“.
Хашим Тачи повеќепати ги демантираше тврдењата на меѓународните функционери негирајќи ја својата вина и вмешаност во трговијата со човечки органи. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.