Четворица поранешни членови на српската паравоена формација „Тигри“, меѓу кои е и Владимир Милисављевиќ кој е осуден за убиството на српскиот премиер Зоран Ѓинѓиќ, беа во понеделникот изведени пред судот во Шпанија на почетокот од процесот за бруталното убиство на нивен сонародник во 2009 година.

Сите петмина, четворицата обвинети, Владимир Милисављевиќ, Лука Бојовиќ, Владимир Мијановиќ и Синиша Петриќ и нивната жртва Милан Јуришиќ, според обвинението на државното обвинителство во Мадрид, биле припадници на ткн Земунски клан, српска мафијашка организација која ја основале поранешни членови на групата „Тигри“ којашто ја формираше и предводеше Жељко Ражнатовиќ Аркан честопати споменуван за сторени воени злосторства во војните во Хрватска, Босна и Херцеговина и Косово, како криминални дејности.Лука Бојовиќ, кого го сметаат за еден од шефовите на Земунскиот клан, мадридското државно обвинителство го обвини дека во март 2009 година со чекан во еден стан во Мадрид го убил Милан Јуришиќ. Владимир Милисављевиќ и Сретко Калиниќ, кој е во затвор во Србија, чија екстрадиција Шпанија не успеа да ја издејствува, подоцна го распарчале телото на жртвата и го ставиле во ладилник.„Следниот ден ги сомлеле деловите од телот во електрична мелница кој се распаднал од куршумите во телото. Сомелените делови ги фрлале во тоалети, а коските со пила ги пресекле и ги фрлиле во реката Манзанарес“, се наведува во текстот од обвинението што го цитираат шпанските медиуми.Интерпол ја предупредил шпанската полиција за нивното присуство во земјата, а таа во февруари 2012 година ги уапсила Милисављевиќ, Бојовиќ, Мујановиќ и уште еден поранешен припадник на бандата Синиша Петриќ кој се криел во Валенсија. Во текот на истрагата биле пронајдени десетина парчиња разно оружје, муниција и податоци за убиството на Јуришиќ, навело мадридското обвинителство. Бојовиќ е обвинет за убиство и може да му биде пресудена казна од 41 година затвор, додека Милисављевиќ, обвинет како соучесник, може да биде осуден на 21 година затвор. Другите двајца можат да добијат затворски казни меѓу 5 и 17 години. Сите се обвинети и за припаѓање на злосторничка организација и нелегално поседување оружје.Процесот ќе трае до четврток во Сан Фернандо де Хенарес, предградие на шпанската престолнина Мадрид.Шпанското правосудство претходно во јануари 2013 година ја дозволи екстрадицијата на Милисављевиќ на Србија, осуден во 2007-та на 35 години затвор за убиството на српскиот премиер Зоран Ѓинѓиќ, со услов претходно да ја отслужи казната во Шпанија./крај/мф/сн

Извор: AFP