Турскиот премиер Ахмет Давутоглу изјави дека меѓународната коалиција предводена од САД би требало да испрати копнени сили против Исламската држава, и повтори дека Анкара каде што се доминантни сунитските муслимани бара неизоставно заминување од власт на алавитскиот (шиитски) претседател Башар ал-Асад, додека турската полиција објави во вторникот дека уапсила 18 лица осомничени за припадност на сириската фракција на глобалната терористичка организација Ал Каеда.

„Мораме заеднички да разговараме за копнените сили. Потребна е заедничка стратегија којашто вклучува воздушна кампања и копнени сили. Меѓутоа. Турција не може самата сето тоа да го изведе“, изјави премиерот Ахмет Давутоглу во интервјуто за турската телевизија CNN.

Предупреди притоа дека без стратегија, победата над Исламската држава може да доведе до вакуум во северна Сирија. којшто би го пополнила друга радикална група.

„Прашањето не е на кој начин (сирискиот претседател Башар ал-) Асад ќе остане и колку долго, прашањето е дали и кога Асад ќе замине“, додаде Давутоглу.

Владата на Давутоглу сака во таа област во северна Сирија да создаде тампон зона, под изговор дека таму сака да ги смести над двата милиона сириски бегалци, но коментаторите сметаат дека основната цел на оваа стратегија е спречувањето на јакнењето на автономија и нејзиното територијално проширување на сириските Курди.

Во меѓувреме агенцијата Dogan (DHA) објави дека турската полиција во централната покраина Коња уапсила 18 милитанти осомничени за регрутирање нови членови на екстремистичката организација Џебхад ан-Нусра (Фронтот на победата), којашто е сириско крило на Ал Каеда.

Меѓу уапсените екстремисти во рамките на широката операција на турските власти против осомничените за тероризам се и две жени. Меѓу уапсените имало и припадници на ан-Нусра нои дошле во Турција на закрепнување, откако биле ранети во борбите во Сирија. Полициски извори додале дека бројот на уапсените во најновата рација може да се зголеми во текот на денот. /крај/мф/сн

Извор: DPA/DHA