Регион
Турција отвори мрежна страница со листа на најбараните терористи
Турските власти отворија во средата интернет страница на која е објавен списокот со најбараните терористи, меѓу кои најмногу има курдски бунтовници и некои џихадисти кои кривично се гонат по нападите на бомбашите самоубијци во Анката од 10-ти октомври, кој со 102-те жртви е најкрвавиот терористички чин во историјата на Турција.
Интернет страницата www.terorarananlar.pol.tr објави список со имиња на 728 лица означени во пет бои, зависно од степенот на нивната опасност. Со црвена се означени најопасните, а со сина, зелена, портокалова и сива, оние кои се сметаат за помалку опасни.На ткн „црвена листа“ има 32 имиња, тројца од нив се водачи на забранетата Работничка партија на Курдистан (PKK), Мурат Карајилан, Чемил Бајик и Хусејин Фехман. На неа и имамот Фетула Ѓулен, исламски конзервативен филозоф и проповедник кој живее во егзил во САД а кој беше сојузник на претседателот Реџеп Тајип Ердоган и се смета за заслужен за неговиот подем, но кој последнава година го обвинува за создавање „држава во држава“ со намера да го урне.На „црвената листа“ се само две непознати за пошироката јавност лица кои се означени како припадници на екстремната сунитска организација Исламска држава. Претходно во средата турското министерство за внатрешни работи објави дека во изминатите девет месеци од 2015 година биле уапсени 285 лица осомничени за припадност или врски со Исламската држава.Повеќето од припадниците на споменатата џихадистичка организација по кои полицијата трага по атентатот на железничката станица во Анкара од 10-ти октомври, се вброени во „помалку опасната“ ткн „сина“ листа.Турското министерство за внатрешни работи се ограничило на објавување на основните биографски податоци за бараните лица и покрај фотографијата наведено е само името, презимето, датумот и местото на раѓање, како и името на организацијата на којашто ѝ припаѓаат.Покрај тоа, се ветува и награда за оние коишто ќе „помогнат“ или ќе „дадат информации“ коишто ќе доведат до апсење на лицата од листата. Таа награда се движи од 300.000 турски лири, или 90.000 евра, до 4 милиони турски лири, или 1,2 милиони евра, за бегалците од „црвената“ листа./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.