Турската полиција повторно во саботата употреби солзавец и истрела гумени куршуми за да растера околу две илјади демонстранти кои се собраа пред просторијата на најголемиот дневен весник во земјата, откако на негово чело беше именуван државен повереник.

Судот во Истанбул донесе во петокот одлука да се именува привремена управа на новинската куќа „Zaman“ којашто покрај дневниот весник Zaman ги поседува и весникот на англиски јазик Today’s Zaman и новинската агенција Cihan. Овие медиуми се сметаат за блиски на исламскиот проповедник имамот Фетулах Ѓулен, кој живее во егзил во САД, а од до сојузник на турскиот претседател Реџеп Тајип Ердоган стана негов најжесток противник.

По избувнувањето на корупциската афера кон крајот на 2013 година, во која беа споменувани повеќе министри во владата на тогашниот премиер Ердоган, турската владејачка партија AKP го обвини Ѓулен за создавање своевидна паралелна држава и за обид за изведување државен удар. Следуваа бројни апсења и смени на високи функционери во полициските и правосудните структури.

Одлуката за привремена управа на весникот Zaman е донесена по барање на обвинителот кој го истражува верското исламско движење на Ѓулен под обвинение за тероризам, пренесуваат турските медиуми.

Полицијата во петокот на полноќ ги зазема просториите на весникот Zaman, откако со солзавец и водени топови ги растера неколкуте стотина луѓе кои се собраа пред седиштето на весникот во Истанбул./крај/мф/сн

Извор: Reuters