Турските власти во средата издале наредба за затворање на преку 130 медиуми, односно три новински агенции, 45 весници, 29 издавачи куќи, 23 радио станици, 15 магазини и 16 телевизиски станици, пренесуваат светските агенции. 

Главната причина за затворањето на овие медиуми е поврзаноста со имамот Фетула Ѓулен, кој во моментов е во САД. Турските власти во средата уапсија 47 вработени од весникот Zaman, медиум кој особено се поврзува со движењето на Ѓулен, а претходно во понеделникот пак беа уапсени 42 новинари и колумнисти.

Организацијата „Репортери без граници“ ја осуди постапката на турските власти, коментирајќи дека поддршката за движењето на Ѓулен не претставува доказ за вмешаност во обидот за државен удар. Бројот на уапсените поради вмешаност во ударот, пак, постојано се зголемува и повеќе од 16 илјади лица се задржани на разговор, додека пак половина од оваа бројка, односно осум илјади ќе одат на судење, изјавил турскиот министер за внатрешни работи Ефкан Ала.

Органзацијата Amnesty International додава дека некои од уапсените било исто така и измачувани, но турските власти ги негираат овие тврдења. Агенцијата Anadolu, пак, пренесува дека уште 1.684 војници биле отпуштени во средата, вклучувајќи 127 генерали и 32 адмирали. Скоро 70 илјади војници, учители, факултетски професори и административци беа отпуштени по обидот за државен удар кој се случи ноќта на 15-ти јули.

Следната цел на турските власти сега се воените средни школи, и сите од нив ќе бидат затворени во четврток, пренесува Al Jazeera. Контролата врз воените академии сега од армијата ќе биде пренесена на министерството за одбрана. Генералниот секретар на ОН, Бан Ки-мун во средата разговараше со турскиот министер за надворешни работи Мевлут Чавушоглу, потенцирајќи дека за секој од притворените мора да бидат презентирани и „кредибилни докази“. Турскиот премиер Бинали Јилдирим, пак, предупреди дека апсењата во земјата ќе продолжат, поради тоа што „процесот се уште не е завршен“./крај/мф/бс