Една седмица по размената на острите реплики меѓу Европската унија и Турција, којашто долго години е кандидатка за членство во ЕУ, претседателот на Советот на Европската унија, Доналд Туск, во вторникот му порача на турскиот претседател Реџеп Тајип Ердоган да се погрижи неодамна притворените лица да добијат чесен правосуден процес.
 

Една седмица по размената на острите реплики меѓу Европската унија и Турција, којашто долго години е кандидатка за членство во ЕУ, претседателот на Советот на Европската унија, Доналд Туск, во вторникот му порача на турскиот претседател Реџеп Тајип Ердоган да се погрижи неодамна притворените лица да добијат чесен правосуден процес.

Во соопштението издадено од канцеларијата на претседателот на Советот на Европската унија, поранешниот полски премиер Доналд Туск со дипломатски јазик вели дека тој и претседателот на Турција, Реџеп Тајип Ердоган, во телефонски разговор расправале за тоа како да ги унапредат односите меѓу Брисел и Анкара. Според Туск, ЕУ го поздравила турското ангажирање за милионите сириски бегалци згрижени на нејзината територија.

Меѓутоа, кога станува збор за минатонеделните апсења на новинари и други лица блиски на еден од најголемите поранешни сојузници на Ердоган, исламистичкиот филозоф и проповедник Фетулах Ѓулен кој живее во егзил во САД, Туск додава: „Разговаравме и за настаните во Турција, па и за неодамнешните притворања и за важноста од непристрасно и транспарентно водење на процесот. Се договоривме да останеме во контакт и двајцата се радуваме на што поскор состанок“.

Пред една седмица Ердоган ѝ порача на ЕУ да не се меша во работите на Турција, бидејќи шефицата на европската дипломатија Федерика Могерини апсењата го нарече „некомпатибилни“ со демократските вредности на Унијата.

„Нас не’ не интересира што бои можела ЕУ да каже, не’ прифаќа ли ЕУ како членка или не, нам за тоа не ни е грижа. Ве молиме, своите мудрости да ги задржите за себе“, му порача турскиот претседател на Брисел.Турската антитерористичка полиција на 14-ти декември изведе акција во тринаесет градови, како и во Истанбул, приведувајќи 27 лица, главно новинари и медиумски работници, меѓу кои и Екрем Думанли, главниот и одговорен уредник на весникот Zaman, еден од главните весници кои се критички настроени кон Ердоган, а е застапник на идеологијата на Фетулах Ѓулен.

ЕУ во неделата навечер преку заедничкото соопштение на шефицата на дипломатијата Могерини и еврокомесарот за соседство и проширување Јоханес Хан, ги осудија споменатите полициски акции оценувајќи дека се спротивни на „европските вредности“ коишто Турција би морала да ги почитува доколку сака да стане членка на Европската унија, како и дека „се неспоиви со слободата на говорот“.

Потоа и турскиот премиер Ахмет Давутоглу порача дека „сите оние коишто се осмелиле да се инволвираат во владините кабинети и да ги прислушуваат доверливите разговори на претседателот и премиерот“ ќе одговараат пред законот. Според него, станува збор за создавање „паралелни институции“, со што алудираше на апсењата на началникот на антитерористичкиот одел во полицијата на Истанбул, како и на уште двајца полициски функционери во други турски покраини во неделната полициска акција.

Пристапните преговори на Турција продолжија во 2013 година, по тригодишниот застој, но односите меѓу Брисел и Анкара повторно се затегнаа по непопустливиот став на турската страна за пресметка со политичките противници кои ги обвинува за конструкции на корупциски афери на власта и создавање „паралелна држава“ во турското општество чија цела е уривање на повеќе од децениското владеење на исламско конзервативната Партија на правдата и развојот (АКР)./крај/мф/сн

Извор: Макфакс