Претставувањето на годинешниот извештај за Србија, изработен во позитивен тон од страна на германскиот европратеник Дејвид Мекалистер во средата беше уште една прилика српските соседи да излезат во бројни барања, без можност Србија да реплицира, пишува Вечерње новости.

На седницата на Европарламентот во Стразбур, бугарскиот европратеник Андреј Ковачев инсистирал на Димитровград да му се врати името Цариброд, односно „овој српски град повеќе да не се нарекува по бугарскиот комунистички диктатор“.

Хрватските европратеници, пак, побарале од Србија да признае дека била агресор. „Хрватска не ја нападна Србија, туку Србија ја нападна Хрватска. Кога ќе нападнете една држава, мора да признаете дека сте извршиле агресија. Што ќе правите со бегалците, што ќе правите со стотиците силувани жени и со украденото богатство?“, запрашала хрватската европратеничка Ружа Томашиќ.

Останатите хрватски пратеници укажале на „гасењето на медиумите на малцинските јазици“, рехабилитацијата на четничкиот водач во текот на Втората светска војна Дража Михајловиќ, проблемот со автономијата на Војводина, а повикале и на признавање на Косово.

На Белград, исто така, му било забележано поради тоа што не ја усогласил својата надворешна политика со онаа на Брисел во однос на Русија, а голем број пратеници побарале и поголема слобода на медиумите.

По извештајот за Србија, од страна на австрискиот известувач Улрика Луначек бил претставен и текстот за Косово, во кој било побарано од страна на петте преостанати земји членки да ја признаат независноста на Косово. Шпанскиот европратеник Хавиер Коузо Пермуј навел дека таа „држава“ настанала преку бомбардирање, и дека во моментов Косово се наоѓа под „мафијашка контрола и тамошните раководители се обвинети за злосторства“./крај/мф/бс