Третиот дводневен самит меѓу шефовите на владите на Кина и 16 земји од централна и источна Европа, започнува во вторник во Белград, а посетата на кинеските челници ќе биде огромна шанса за разговори околу плановите за соработка меѓу Пекинг и овие европски земји, пренесува Б92.
 

Третиот дводневен самит меѓу шефовите на владите на Кина и 16 земји од централна и источна Европа, започнува во вторник во Белград, а посетата на кинеските челници ќе биде огромна шанса за разговори околу плановите за соработка меѓу Пекинг и овие европски земји, пренесува Б92.

Соработникот на Кинеската академија за општествени науки, Конг Тианпинг во изјава за кинеската новинска агенција Ксинхуа изјавил дека механизмот 16+1, како и новата платформа за соработка меѓу Кина и централна и источна Европа, започната во 2012 година, во голема мера ќе ја зголеми политичката волја на двете страни за билатерална соработка.

Претседавачот со групата на пријателство меѓу Европската унија (ЕУ) и Кина, Нирж дева во Европскиот парламент изјавил дека односите меѓу двете страни привлекле дополнително внимание во текот на изминатите година дена од самитот во Букурешт. Трговијата меѓу двете страни во периодот од јануари до октомври достигнала 50 милијарди долари и се зголемила за 10,1 отсто во однос на истиот период минатата година.

Кинеските медиуми го пренесуваат и мислењето на Јустина Шчудлик Татар, аналитичар за Кина при полскиот институт за меѓународни односи, а тоа е дека односите меѓу двете страни во последните две-три години се интензивни, независно дали е тоа во формат 16+1 или, пак, во билатералните односи.

„Кина и централна и источна Европа меѓусебно повторно се откриваат“, изјавила Шчудлик Татар, алудирајќи на периодот во минатите две децении кога односите не беа интензивни поради тоа што 16-те земји беа посветени на „враќањето кон Европа“.

Според полската аналитичарка, идните резултати од соработката 16+1, како што се инвестициите од Кина во централна и источна Европа, зголемувањето на трговската размена и подобрувањето на инфраструктурната поврзаност, не само што ќе ја унапредат соработката меѓу двете страни, туку можеби и ќе го намалат постоечкиот јаз меѓу западна и источна Европа.

Во оваа смисла, форматот 16+1 ги унапредува позициите на централна и источна Европа внатре во ЕУ, додала Шчудлик Татар.

Според директорката во стратешкиот институт Пријатели на Европа од Брисел, Шада Ислам, многумина во институциите на ЕУ во почетокот биле загрижени поради дијалогот 16+1, сметајќи дека тоа ќе им штети на односите меѓу Унијата и Кина, но дека сега такви грижи нема.

„Државите членки на ЕУ, големите и малите, треба да се тежнеат кон посилни билатерални односи со Пекинг. Кина е јасно заинтересирана за таков однос со членките на ЕУ“, додала Ислам, која смета дека таквите односи би можеле да придонесат за нов начин на размислување и идеи за поширок дијалог околу најголемата регионална интеграција во светот./крај/мф/бс