На парламентарните избори кои ќе се одржат на 12-ти октомври, Босна и Херцеговина (БиХ) влегува со парадокс, бидејќи во некои градови ќе има повеќе гласачи отколку жители, пренесува Танјуг.

На пример, според податоците на босанската Централна изборна комисија (ЦИК), во општината Козарска Дубица, право на глас на последните локални избори имале 23.696 граѓани, додека прелиминарните податоци од 2013 година покажуваат дека во оваа општина живеат 23.074 жители.

Слична е и во Босанска Крупа, каде според податоците на ЦИК, право на глас имаат 1.799 граѓани, а пописот покажал дека вкупниот број жители во општината изнесува 1.687.

Експертите и претставниците на цивилниот сектор се согласуваат дека со резулатите од пописот и со избирачкиот список нешто не е во ред, но мислењата се поделени околу тоа кои бројки не се точни.

Во Заводот за статистика на Република Српска, кој учествуваше во спроведувањето на последниот попис, тврдат дека единствено тие имаат вистинско истражување кое го дава реалниот број на населението, и дека на резултатите од пописот апсолутно може да им се верува, пишува Nezavisne novine.

Вехад Шехиќ, претставник на коалицијата „Под лупа“, која обединува седум невладини организации од БиХ, изјавил дека е јасно оти во овој случај потфрил пописот, и дека податоците се неточни.

Според него, една од најбитните работи која треба да се направи за парламентарните избори е спречувањето на „изборниот инжинеринг“, односно појавувањето на луѓето кои за време на изборите се пријавуваат во одредена општина, а по изборите се враќаат во местото каде што навистина живеат.

Портпаролката на босанксата ЦИК, Максида Пириќ изјави дека од 2006 година се врши пасивна регистрација на избирачите во БиХ и дека сите оние кои вадат лична карта и стануваат полнолетни, автоматски се запишуваат во централниот избирачки список, а до крајот на август треба да биде познато колку граѓани ќе имаат право на глас./крај/мф/бс