Во новиот состав на бугарскиот парламент најверојатно ќе влезат шест партии, покажало истражувањето на бугарската агенција Alpha Research во пресрет на предвремените парламентарни избори закажани за 5-ти октомври, пренесуваат бугарските медиуми.

При вакви претпоставки, партијата Граѓани за европски развој на Бугарија (ГЕРБ) би имала од 98 до 100 пратеници, потоа бугарската Социјалистичка партија (БСП) би имала од 53 до 55 мандати, Движењето за права и слободи (ДПС) би освоило од 44 до 46 пратеници, а партиите Реформаторски блок (РБ) и Бугарија без цензура (ББЦ) би имале по 16 до 18 пратеници. Шестата партија најверојатно ќе биде Патриотскиот фронт, која би освоила 12 пратеници.

Според ова истражување, ГЕРБ би добил 34,1 процент од гласовите, БСП – 19,1 процент, ДПС – 15,4 проценти, а Реформаторскиот блок и Бугарија без цензура – по 6 проценти, додека Патриотскиот фронт би освоил 4.2 проценти.

Според Alpha Research, во финалето на една пасивна и доста безживотна кампања во која и ГЕРБ и БСП се главните играчи, најголемиот профит и најголемото изненадување би можело да дојде од помалите бугарските партии.

Во поглед на бројот на гласачи, на овие избори може да се очекува дека излезност од три  милиони и 200 илјади до три милиони и 300 илјади гласачи, а очекуваната активност е пониска од онаа на изборите во 2013 година, и само силна мобилизација на бугарските граѓани во последните неколку дена, како и на оние кои ќе гласаат на избирачките места во странство може да го промени овој тренд, се вели во заклучокот од истражувањето на Alpha Research./крај/мф/бс