Група експерти од Советот на Европа (СЕ) за сузбивање на трговијата со луѓе го објавила најновиот извештај за Хрватска, во кој се наведува загриженост поради се поголемиот број на исчезнати деца меѓу бегалците, а властите во Загреб се повикуваат да преземат мерки за спречување на ваквите појави, пренесуваат хрватските медиуми.

Оваа порака, пишува Jutarnji list, на официјален Загреб му ја пренел и генералниот секретар на СЕ, Торбјорн Јагланд. Групата експерти на СЕ, позната како ГРЕТА, во извештајот ги поздравила некои од мерките кои се преземаат, како што се усвојувањето на законите, оспособувањето на службениците, подигнувањето на свеста во училиштата околу трговијата со луѓето и националната стратегија за сузбивање на сиромаштијата и социјалната исклученост.

Од ГРЕТА предупредиле и дека за решавањето на некои прашања сепак треба дополнителен напор.

„Со оглед на неодамнешниот извештај за голем број на деца бегалци кои исчезнуваат, идентификацијата на децата кои се жртви на трговијата со луѓе станува приоритет за цела Европа“, рекол Јагланд. Меѓу проблемите кои во Хрватска биле идентификувани од страна на експертите на СЕ се и идентификацијата на се поголемиот број на илегални мигранти, потоа на барателите на азил и малолетниците без придружба.

Во извештајот била изразена загриженост и поради зачестените исчезнувања на децата од бегалските центри, повикувајќи ги хрватските власти да вложат поголеми напори за да ги спречат ваквите инциденти. Групата експерти исто така оцениле дека во Хрватска расте бројот на жртви на трговија со луѓе, особено жени и девојки кои често се жртви на присилна проституција на јадранското крајбрежје за време на туристичката сезона, но и жртвите кои се присилуваат на работа во земјоделството или градежништвото./крај/мф/бс