Новиот словенечки закон за медиуми ќе им наложува на уредниците да ги бришат навредливите коментари преку кои се шири говор на омраза, а доколку не го направат тоа во најкраток можен рок предвидени се санкции, односно казни за главните уредници во висина од 500 до 5 илјади евра, пренесува Hina.

Се работи за нацрт закон кој сé уште е во фаза на јавна расправа, но кој веќе предизвика полемики и спротивставени мислења, бидејќи едни сметаат дека со ваквото решение за шири простор за слобода на изразување со политичка коректност, додека, пак, други сметаат дека се работи за цензура.

Воведувањето на санкциите и бришењето на некоректните коментари на читателите и слушателите, според словенечкото министерство за култура, кое го предложи законот, е поради потребата од намалувањето на појавата на говор на омраза, особено во медиумите на интернет платформите.

Од министерството тврдат дека со ова само ја применуваат Резолуцијата за националната програма за сузбивање на криминалитетот, која спречувањето на говорот на омраза го поставува како една од своите главни цели.

Доколку новиот закон за медиуми биде потврден во Парламентот, во која партиите од коалицијата на словенечкиот премиер Миро Церар имаат мнозинство, уредниците ќе мораат да објават јасни правила и мерки за тоа кои коментари се коректни, а кои не се за објавување, односно ќе мора строго да се придржуваат до овие критериуми./крај/мф/бс