Повеќе од 400 луѓе се собраа во саботата пред зградата на локалната администрација во бугарскиот црноморски пристанишен град Варна во организација на опозициската Бугарска социјалистичка партија (БСП) на протестот против војната во Украина.

Учесниците на манифестацијата истакнаа пароли како „Не за војната во Украина“ и „Санкциите го уништуваат туризмот во Варна“. Групата скандирала „Сакаме мир“, „Не за санкциите на Јужен поток“, пренесуваат бугарските медиуми.

Сличен протест во организација на БСП се одржа и во главниот град Софија во вторникот, пред зградата на администрацијата на бугарскиот претседател. Демонстрантите протестираа против евентуално учество на Бугарија, којашто е членка на НАТО и Европската унија, во воена поддршка на прозападните власти во Киев. Исто така, бараа „запирање на антируската политика“ којашто се води во земјата.

Исто така, беше потпишана и петиција до премиерот Бојко Борисов неговата влада да преземе итни мерки за заштитата на бугарското малцинство во Украина, и да се заложи пред меѓународните институции за укинување на европските санкции против Русија, коишто според нив имаат голем негативен ефект врз бугарската економија, и особено врз туризмот во Варна, како и да се преземат меѓународни напори за да се натера Москва да го преиспита своето решение да ја промени трасата на „Јужен поток“ и гасоводот да минува низ Бугарија.

Русија кон крајот на минатата година го објави запирањето на проектот за гасоводот „Јужен поток“, кој требаше да минува под Црното Море и на територијата на Европската унија да излегува во Бугарија, и преку него да испорачува гас за неа и Унгарија, како и за другите две членки на ЕУ, Австрија и Италија. Москва за пропаѓањето на проектот го обвини Брисел, поради „неконструктивниот став“ и политички пречки, откако ЕК бараше усогласување со европското законодавство.

Наместо тоа, руската страна одлучи да гради гасовод преку Турција во близина на границата со Грција, за снабдување на потрошувачите во јужна Европа. И покрај притисоците врз Софија да ја намали зависноста од руските енергенси, германската канцеларка Ангела Меркел го советуваше бугарскиот премиер Бојко Борисов да преговара со Москва за заживување на проектот „Јужен поток“, но Москва е јасна дека тој проект е напуштен./крај/мф/сн

Извор: Макфакс