Српскиот премиер Александар Вучиќ е уверен дека никоја нема намера и желба да ја сопре Србија на нејзинот европски пат, и смета дека повторното воведување на шенгенските визи за српските граѓани нема да се оствари, пренесуваат српските медиуми.

„Ние ја почитуваме Европа, сакаме да бидеме дел од неа, но бараме да се почитува гласот на Србија и да го сочуваме својот национален идентитет и интегритет“, рекол Вучиќ во интервју за „Вечење новости“, на прашањето дали може да се случи Брисел да ја сопре евроинтеграцијата на Србија, доколку таа ја продолжи својата соработка со Москва.

Вучиќ повторил дека Србија нема да менува својата позиција во однос на Русија и верува дека тоа нема да го загрози европскиот пат.

„Секогаш ќе ги почитуваме ставовите на другите. Но народот нас не избра за да ја спроведеме политиката на српските интереси, а не интересите на другите земји. Тоа е наш одговор денес, а истиот ќе го дадеме и утре“, додал српскиот премиер.

Во однос на Косово, Вучиќ изјавил дека Берлин никогаш не побарал од Србија да не го попречува присуството на Косово во Обединетите нации (ОН).

„Верувам во зборот на германската канцеларка Ангела Меркел и сигурен сум дека Србија ќе ги отвори поглавјата 32 и 35 уште за време на оваа година“, рекол Вучиќ и додал дека не се точни тврдењата дека влегувањето на Србите во косовскиот Парламент, индиректно значи признавање на Косово./крај/мф/бс