Претседателот на Република Српска, Милорад Додик, за време на руската анексија на Крим имал намера да побара отцепување на Република Српска од Босна и Херцеговина (БиХ), тврдејќи дека има руска поддршка, но во ова бил спречен од српскиот премиер Александар Вучиќ, тврди Бодо Вебер од берлинскиот Совет за политики на демократизација.

Вебер, еден од авторите на студијата „Западниот Балкан и украинската криза – промена на играта за политиката на ЕУ и САД“, изјавил за Радио Слободна Европа дека тој и неговиот колега Курт Басоњер за време на изработката на оваа студија случајно наишле на оваа информација, и дека таа била потврдена од повеќе извори и „за неа знаел цел западен дипломатски кор“.

„Во таа информација се открива дека Милорад Додик, претседателот на Република Српска, на почетокот на руската анексија на Крим, му се јавил на српскиот премиер Александар Вучиќ и сериозно сакал да ја искористи оваа состојба за да го оствари она со што со години се заканува, но Вучиќ го спречил во тоа“, рекол Вебер, додавајќи дека оваа информација му делува како веродостојна.

„Во повеќе наврати видовме настапи на премиерот Вучиќ кои сведочат за ова. Кога кон крајот на јуни Вучиќ беше во посета на Германија, и беше притиснат од прашањата на некои германски новинари, Вучиќ јасно кажа дека српската влада не ја дели позицијата на Додик“, објаснил Вебер.

Тој додал дека „не му било јасно“ дали навистина Додик имал руска поддршка за овој чекор и дека тезата дека Москва во тој момент сакала да отвори уште едно жариште – не во Молдавија, Приднестровље или Грузија, туку во Република Српска, „не била уверлива“.

„Пред сè би рекол дека Додик верувал дека ќе ја има руската поддршка“, додал Вебер.

Вебер навел дека пред две години работел и на студија за односот на раководството на Србија кон челникот на Република Српска, кога на власт сè уште била Демократската партија на тогашниот српски претседател Борис Тадиќ. Според Вебер, Тадиќ го искористил тој „братски однос“ со Додик за својот „национален имиџ“, но дека не можел целосно да го контролира Додик, „кој и за него претставувал проблем“.

„Вучиќ, за разлика од Тадиќ, кон Додик воспостави дистанца“, рекол Вебер и додал дека српскиот премиер во мај на заедничка прес конференција со Додик, кој тогаш повторно го ставил под прашалник опстојувањето на државата Босна и Херцеговина, рекол дека тоа не е позиција на владата на Србија./крај/мф/бс