Регион
Вучиќ: Немаше државен удар, не се чувствувам загрозено
Српскиот премиер Александар Вучиќ смета дека во земјата не бил извршен државен удар и дека не постојат ниту сили ниту пак волја за такво нешто, но дека постои „перманентна“ намера да се сруши владата, пренесуваат српските медиуми.
Во интервјуто за РТС српскиот премиер потенцирал дела медиумите во земјата цело време полемизираат со еден српски новинар, кој ги лансирал тврдењата за државен удар.
„Новинарот Драган Ј. Вучичевиќ пред десет дена изнесе некои работи кои не се целосно вистинити, државен удар е кога доаѓа до промена на власта одвнатре. Во овој случај, не мислам дека постоеше државен удар, ниту сила ниту волја за такво нешто. Овде постои перманента намера да се сруши српската влада, но не се работи за државен удар“, изјавил Вучиќ.
На прашањето дали некои западни земји се вмешани во неодамнешните случувања, премиерот рекол дека не сака да говори за нешто за кое што нема докази.
„Не можам да говорам за амбасадите. Се случуваа чудни работи, од една западноевропска земја, кога бев во посета на мигрантите, ме известија дека се случило нешто, односно еден човек секаде се распрашувал за тоа колкаво е моето обезбедување и од кое единици е. На крајот го повикаа и се востанови дека се работи за главниот известувач, односно првиот секретар на една западна амбасада. Зошто тоа им беше нив важно не знам, но за мене тоа беше разочарување. Сепак не сакам да ги расипам односите со таа земја. Тоа се случи после инцидентот во Сребреница“, раскажал Вучиќ.
Српскиот премиер исто така изјавил дека му е мака поради тоа што зад одредени медиумски притисоци стоел и Брисел, односно Европската унија.
„Благодарам поради тоа што ни дадовте големи пари за поплавите, 70 милиони евра, но зошто не го дадовте и тој уште еден милион повеќе. На луѓето повеќе ќе би им значело тоа отколку што се бавевте со тоа да се изнесат невистини против Владата на Србија и тоа да се нарече `некакво истражување`“, потенцирал Вучиќ.
Во однос на проблемите внатре во неговата партија, Српската напредна партија (СНС), Вучиќ изјавил дека се работи за партија во која луѓето имаат различни идеи, но дека суштинско е постигнувањето на напредок.
„СНС е партија од луѓе кои имаат различни идеи, но кои правецот на напредок им е основен и суштински. Смешни се тврдењата дека Зорана Михајловиќ (министер за сообраќај и инфраструктура) е мој главен опонент во Владата. Доколку на Зорана и одговара да се пофали со тоа, во ред, но јас тоа не го забележав. Имам доверба во неа и тоа што таа го работи во министерството“, рекол Вучиќ. Тој се осврнал и на работата на српскиот претседател Томислав Николиќ, нагласувајќи дека „претседателот одговорно ја врши својата работа и има поддршка од Владата и од мене“./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.