Дваесетедногодишно момче загинало околу полноќ кон саботата на просторот на Петроварадинската тврдина во војводинскиот административен центар Нови Сад, каде што се одржува познатиот музички фестивал Егзит, објавија во сабота српските медиуми, a министерот за внатрешни работи изјави дека девет лица биле уапсени за употреба на наркотици.

Според локалните медиуми, момчето по излегувањето од фестивалот се упатило кон Каменичкиот пат, а несреќата се случила кога се обидело да прескокне еден од бедемите на старата Петроварадинска тврдина.

„По доаѓањето на местото на несреќата, нашата лекарска екипа, за жал, можеше да констатира само смрт на едно младо машко лице како последица на пад од бедемот“, изјавила за агенцијата Танјуг, портпаролката на Брзата помош, Мирјана Бурсаќ.

Според соопштението на Егзит фестивалот, сé уште не се познати сите околности на трагедијата. Ниту полицијата, ниту организаторите засега не го соопштуваат идентитетот на жртвата.

„Судејќи според времето на влегување, момчето многу кусо се задржало на Егзит и откако излегло од фестивалската капија се упатило надвор од фестивалскиот простор кон Каменички пат. Во тек е истрагата и уште не се познати причините за прескокнување на оградата над бедемот и другите околности на оваа несреќа која се случи на пат покрај Егзит фестивалот“, се наведува во соопштението на организаторите.

Според новосадските медиуми, екипите на Заводот за инта медицинска помош во Нови Сад на Петроварадинската тврдина на вториот ден од фестивалот интервенирале вкупно 79 пати. „Од 79-те интервенции во 76 случаи нашите екипи проблемот го решавале на самото место, а тројца пациенти се упатени на натамошна дијагностика во Ургентниот центар“, рече Бурсаќ. Според неа, главно станувало збор за главоболки, алергиски реакции и повреди.

Оваа трагедија потсетува на сличната несреќа од јули 2008 година кога на истиот фестивал по невреме од паѓање на гранка во кампот на Егзит загина една белграѓанка а тешко беа повредени момче и девојка од Македонија. Случен случај како сегашниот, пак, имаше во 2009 година кога исто така од бедемот падна и загина млад Британец.

Во саботата српскиот министер за внатрешни работи Небојша Стефановиќ изјави за медиумите дека во петокот на Егзит присуствувале 30 илјади луѓе, оти немало посериозни инциденти, бидејќи се преземени сите мерки да се осигури безбедноста, а само девет лица биле приведени поради злоупотреба на наркотици./крај/мф/сн

Извор: Макфакс