На источниот дел од границата на Србија со Бугарија, во областите околу Неготино и Димитровград, во последните две седмици пораснал притисокот за нелегално влегување на имигрантите во Србија, изјави во четвртокот портпаролот на заедничките сили на српската војска и полицијата чиишто патроли се ангажирани на границите со Македонија и со Бугарија. 

„Имигрантите на сите начини се обидуваат илегално да влезат во Србија, користејќи ги шумите и непристапните предели за каде што мислат дека нашите патроли нема да ги забележат. Секојдневно ја менуваме тактиката за да можеме да ги спречиме во тоа“, изјави за Радио-телевизија Србија претставникот на заедничките сили на војската и полицијата на Србија, Јован Кривокапиќ.

Српската војска и полицијата од 22-ри јуни, со одлука на владата, се ангажирани во секојдневни патроли и по длабочина на територијата долж границата со Македонија и со Бугарија, од каде што е најголем притисокот на имигрантите кои настојуваат илегално да влезат во Србија и да одат натаму, преку Унгарија и Хрватска, во западните земји од Европската унија.

Кривокапиќ соопшти дека од средината на јуни до средината на септември се откриени околу 7.500 луѓе кои се обиделе илегално да влезат на територијата на Србија, а спречувајќи ги во тоа прекинати се и неколку канали за криумчарење луѓе, што, според него е „еден од приоритетите на заедничките сили на војската и полицијата“. „Изминатата ноќ е фатена една група од 50 имигранти со криумчар, државјанин на Србија од Врањска Бања“, изјави Кривокапиќ.

Одговарајќи на прашањето дали подигнувањето на ограда на границите би можело да биде едно од решенијата за спречување на илегалните имигранти, Кривокапиќ одговори дека таквата одлука може да ја донесат државните органи,а обврската на заедничките сили на војската и полицијата е одлуките на државата да ги спроведат на терен.

Сите имигранти коишто не се откажуваат од влегувањето во Србија се сместуваат во центрите за прифаќање и се подвргнати на натамошна процедура според меѓународните прописи и конвенции, рече српскиот министер за труд и социјална грижа, Александар Вулин. Тој претходно рече дека Србија би можела да презема порадикални мерки во спречувањето на илегалната миграција, особено бидејќи во последниот период станувало збор за економски имигранти од Пакистан и од Авганистан.

Вулин вели дека е време да му предложи на премиерот „некои подрастични мерки“, имајќи предвид дека структурата на имигрантите се променила, како и дека меѓу сé повеќе има економски имигранти. „Имаме војска и полиција на границите, но можеби и бариерите и поставувањето на одредени препреки е едно од решенијата за да се намали бројот на имигрантите … Економските имигранти не можат да идат никаде во Европа, па тогаш не можат да останат ниту во Србија“, порача Вулин.

Мигрантската криза беше една од темите на состанокот на премиерот на Унгарија, Бугарија и Србија, Виктор Обран, Бојко Борисов и Александар Вучиќ пред два дена во бугарскиот црноморски град Бургас. Тие, како што рече Вулин, разговарале за „моменталниот статус на мигрантската криза и особено внимание му посветиле на променетата структура на имигрантите“, а изразиле и голема загриженост од тоа што мигрантската и бегалската криза не завршуваат./крај/мф/сн

Извор: Макфакс