Еднокомпонентната вакцина против коронавирусот „спутник лајт“ е регистрирана во Русија, а нејзината ефикасност е 79,4 проценти. Тоа е повеќе отколку кај многу вакцини во две дози, објави Рускиот фонд за директни инвестиции (РФПИ).

„Министерството за здравство на Русија, Националниот истражувачки центар за епидемиологија и микробиологија „Гамалеја“ и РФПИ објавуваат дека е регистрирана еднокомпонентната вакцина против коронавирусот, „спутник лајт“. Ефикасноста на еднокомпонентната вакцина е 79,4 проценти од 28-миот ден по имунизацијата. Стапката на ефикасност од околу 80 проценти ја надминува стапката на ефикасност на многу вакцини за кои се потребни две дози“, се вели во соопштението.

Според лабораториското истражување на центарот „Гамалеја“, вакцината „спутник лајт“ е ефикасна против сите нови видови на коронавирус, се додава во соопштението на Фондот.

„Не се регистрирани сериозни несакани ефекти по имунизацијата со вакцината ‘спутник лајт’“, се наведува во соопштението.

Вакцината „спутник лајт“ е првата компонента на вакцината „спутник В“ – рекомбинантен аденовирусен вектор кој користи човечки серотип 26 (Ad26).

„Спутник лајт“ не бара посебни услови за складирање и логистика, а цената е прифатлива – помалку од 10 долари, пренесува „Спутник“.

Режимот на единечна доза овозможува голем број луѓе да се вакцинираат за кратко време.

Шефот на РФПИ, Кирил Дмитријев, посочи дека „спутник В“ останува главно средство за вакцинација против корона во Русија, додека еднокомпонентната вакцина „спутник лајт“ ќе се извезува во странство.

Рускиот фонд објавува дека првата доза на вакцина „спутник В“ ширум светот ја примиле повеќе од 20 милиони луѓе до 5 мај.

Во Франција почна вакцинацијата против Ковид-19 за млади од 16 и 17 години со болести поради кои се изложени на висок ризик од развој на тешка форма на Ковид-19.

Тие ќе можат да се вакцинираат со вакцината на „Фајзер / Бионтек“, единствената што моментално е одобрена за лица со 16 и 17 години.

Претходно, здравствените власти утврдија список на патологии со висок ризик од развој на тешка форма на Ковид за постари возрасни групи.

На тој список се наоѓаат карциноми во фаза на третман, акутно и хронично заболување на бубрезите, трансплантација на органи, цистична фиброза, Даунов синдром и некои ретки болести.

Ваквите патологии влијаат на 800.000 возрасни лица, велат официјалните власти во Франција.

Деновиве владата го прошири списокот на оние кои можат да се вакцинираат за да се забрза кампањата.

Од саботата, секој на возраст помеѓу 18 и 50 години со коморбидитети може да се вакцинира, но изјавата од кандидатот е доволна и не е потребна медицинска препорака.

Црна Гора е земја која е најмногу проруски ориентирана од сите членки на НАТО, покажа истражувањето на институтот „Глобсек“ од Братислава.

Студијата се занимава со влијанието на Русија врз земјите од Централна и Источна Европа и Западен Балкан. Резултатите од извештајот се базираат на анкети на јавното мислење, а анкетирано е населението на Македонија, Бугарија, Чешка, Унгарија, Црна Гора, Полска, Романија, Србија и Словачка.

Граѓаните на Македонија имаат многу мала перцепција дека Русија е закана. По Србија, Северна Македонија најмногу верува дека Русија е најсилната светска велесила, додека две третини од населението негува чувство на поврзаност со Русија преку словенското братство. Една третина од граѓаните сметаат дека НАТО е одговорен за докажување на Русија и дека Западот неправедно ја обвинува Русија за разни дела, се наведува во истражувањето.

Црна Гора е земја која е најмногу проруски ориентирана од сите членки на НАТО, покажа истражувањето.  Според истражувањето, мнозинството граѓани на Црна Гора сметаат дека Русија е братска земја, поради што ја прифаќаат реториката што ја претставува Русија како жртва.

Според наодите на „Глобсек“, поддршката на Црна Гора за Запад е 35 проценти, додека 25 проценти од испитаниците се ориентирани кон Исток, што е убедливо најголем процент од сите земји опфатени со истражувањето.

Младите во Македонија, како и нивните врсници од Црна Гора, Србија и Унгарија, честопати ја гледаат Русија како стратешки партнер.

„Објаснувањето е веројатно во фактот дека тие (младите) се родени значително по завршувањето на комунизмот, поради што тие почесто стануваат жртви на проруската и антизападната политика. Граѓаните на Црна Гора, 38 проценти од нив, веруваат дека Русија е најважниот стратешки партнер. Од сите девет земји во кои беше спроведено истражувањето, 59 проценти од граѓаните на Србија ја гледаат Русија како доминантен партнер“, се вели во извештајот на „Глобсек“.