Украинските експерти криминалисти започнаа со истрагата, со разгледување и правење скица на местото на падот на малезискиот патнички авион „Boeing 777“ кој се урна во четвртокот во источна Украина, во близина на границата со Русија на територија којашто ја контролираат проруските бунтовници.

Патничкиот авион „Boeing 777“ на малезиската воздухопловна компанија „Malaysia Airlines“ на летото МН17 од Амстердам за Куала Лумпур се урна на 17-ти јули со 298 патници и членови на екипажот, од кои 85 деца.Остатоците од авионот се расфрлани во област од 20 километри, која е под контрола на проруските ткн народни милиции на самоодбраната. Досега се пронајдени 186 тела на загинатите. Украинските власти и Западот кој ги поддржува вината ја префрлаат врз проруските бунтовници и врз Русија, алудирајќи дека авионот е соборен. Бунтовниците тврдат дека не поседуваат ракетен систем кој може да собори цел на 10.600 метри височина на којашто летал малезискиот авион, додека руското министерство за одбрана соопшти дека неговиот радарски систем регистрирал активност на ракетен систем „Бук – М1“ на украинската армија во времето на трагедија. Притоа, руската страна потсетува на трагедијата од 2001 година, кога украинските противвоздушни сили на Црно Море соборија руски патнички авион „Ту-154“ на линијата Тел Авив – Новосибирск, кога загинаа 78 луѓе од кои 66 Израелци и 12 Руси членови на екипажот, и долго време негираа своја инволвираност. Покрај тоа, британските медиуми објавија дека авионот на „Malaysia Airlines“ летал 483 километри посеверно од вообичаената рута, но дека не пилотите не добиле предупредување. Москва, исто така, бара одговор од Киев за информацијата на социјалните мрежи дека шпански контролор на летот кој работи во Украина предупредил дека малезискиот авион е следен од два воени украински авиона.Владата на Украина во петокот предложи во истрагата да учествуваат воздухопловните власти на Малезија и Холандија, кои веќе испратија свои експерти, како и Интерпол, на Европската комисија, на компанијата „Boeing“, на ICAO (Меѓународна организација за цивилна авијација), Eurocontrol и NTSB.Во саботата во Киев се очекуваат 62 малезиски експерти, од кои двајца се стручњаци за авионски катастрофи, кои треба да ги испитаат причините за падот на авионот, бидејќи во авионот летале 44 Малезијци и 15 членови на екипажот на малезиската компанија, бидејќи ова е втор инцидент со авион на „Malaysia Airlines“ за последните четири месеци, откако на 8-ми март исчезна нејзин авион на линијата Куала Лумпур – Пекинг, од кој сѐ уште нема никакви траги. Малезискиот премиер Наџин Разак изјави во петокот навечер дека разговарал со рускиот претседател Владимир Путин инсистирајќи на неопходноста од непречена и објективна истрага. „Исто така, му кажав на Путин дека местото на несреќата не би смеело да се контаминира додека екипата не ја започне својата истрага“, рече малезискиот премиер во контекстот на западните префрлања на вината кон Русија.Путин, инаку, претходно во петокот соопшти дека целата одговорност за трагедијата ја носи земјата на чијашто територија тоа се случило, истакнувајќи дека тоа е уште една потврда дека властите во Киев треба веднаш да ги прекинат воените дејствија во источна Украина и да седнат со сите субјекти на преговарачка маса да ги надминат разликите.Американскиот претседател Барак Обама, исто така, инсистираше дека истрагата мора да биде „слободна“ и „непречена“. Кинескиот претседател Си Џинпинг издаде соопштение во кое повикува на чесна и објективна истрагата за уривањето на малезискиот авион. „Истрагата треба да пронајде докази што е побрзо можно“, изјави кинескиот челник./крај/мф/сн

Извор: Reuters/РИА Новости