Израел и палестинското исламискичко движење Хамас се согласија ноќта кон вторникот со египетскиот предлог за 72-часовниот прекин на огнот со кој би требало да се прекине четиринеделното насилство и израелската офанзива во палестинската енклава Појасот Газа, откако израелската армија соопшти доцна ноќта дека ги уништиле речиси сите подземни тунели на милитантите што си го постави како главна цел на последната воена операција на палестинските територии.

Според предлогот, прекинот на огнот ќе започне во 7 часот наутро, а потоа делегации од високи палестински и израелски функционери ќе пристигнат во египетската престолнина Каиро на индиректни преговори за воспоставување примирје со посредство на Египет, зад кое стојат САД и ОН, Катар и Турција кои имаа интензивни преговори со палестинските фракции чии претставници претходно во Каиро составија заедничка листа од услови за прекин на огнот, јавуваат агенциите.Делегацијата којашто ја предводеше Азам ал-Ахмад го извести Египет за палестинската одлука, објави официјалната палестинска новинска агенција Wafa. Ал-Ахамд во Каиро ја води делегацијата составена од претставници на сите релевантни фракции, меѓу кои во овој случај се главните протагонисти Исламското движење на отпорот (Хамас) и Исламски џихад.Палестинската делегација претходно во понеделникот во Каиро разговараше со челникот на египетските разузнавачки служби и се договори за планот за прекин на насилствата. Во заедничката листа на палестинските услови се вброени прекин на огнот, повлекување на израелските сили од Појасот Газа, престанување на целосната блокада на палестинската енклава и од Израел и од Египет, ослободување на палестинските затвореници од израелските затвори и започнување на обновувањето на разурнатата Газа.Неколку часа подоцна, потесниот политичко-безбедносен кабинет на израелскиот премиер Бенјамин Нетанјаху го прифати египетскиот предлог, соопшти за Reuters висок функционер кој барал да остане анонимен. „Израел го извести Египет дека го прифаќа предлогот за прекин на огнот“, рекол. Претходно Армијата на одбраната на Државата Израел објави дека ги уништила сите познати тунели на милитантите во Појасот Газа. „Сите тунели коишто ги откривме, се уништени“, изјави за јавната телевизија портпаролот на израелската армија. Додаде дека израелската армија во Газа „има многу други мисии коишто неопходно мора да се извршат“.Подоцна, по израелското прифаќање, и Хамас кој управува со Појасот Газа од 2007 година објави дека се согласува со предлогот за примирје. „Хамас пред малку му порача на Египет дека го прифаќа 72-часовниот период на примирје“, изјави за Reuters портпаролот на движењето, Сами Абу Зухри.Израел на 8-ми јули ја започна офанзивата под назив „Линија (раб – острица) на одбраната“ (Неуништлива карпа – на хебрејски) во којашто загинаа, според палестински болнички извори, 1.865 Палестинци, од кои поголемиот дел се цивили а меѓу нив и 400 деца. Ранети се над 9.400 луѓе. Според истиот извор, од вкупниот број жртви, едвај третина отпаѓаат на милитантите. Повеќе од четвртината од 1,8 милионското население на оваа најсиромашна територијална заедница во светот беше принудена да ги напушти своите домови. Три илјади станбени згради, куќи, училишта и други објекти се целосно уништени или значајно оштетени.Од друга страна, израелската армија потврди дека загубила во копнената офанзива 64 војници и офицери, а во палестинските ракетирања на израелските територии загинаа три цивила./крај/мф/сн

Извор: Макфакс