Израел во четвртокот на шест часа ја запира воената операција против цели на исламистичкото движење Хамас во палестинската енклава Појасот Газа за да се дозволи да се обноват резервите од храна и вода за цивилното население коешто десетти ден живее под постојано бомбардирање, соопшти ноќта кон четвртокот израелската армија.

„Армијата веќе утре, четврток 17-ти јули, ќе овозможи хуманитарен прозорец. Меѓу 10 и 16 часот по локално време (од 9 до 15 часот по средноевропско време) Тсахал (војската) ќе ги сопре оперативните активности во Појасот Газа и ќе ги прекине нападите. Хуманитарниот прозорец ќе му овозможи на цивилното население да и пополни залихите неопходни за задоволување на хуманитарните потреби“, се наведува во соопштението на израелската армија.Армијата, исто така, ветува дека „остро и решително“ ќе го спречи секој обид на милитантите да го исползуваат „хуманитарниот прозорец“ за напади вез „израелски воени и цивилни цели“.Палестинското исламистичко движење Хамас, кое претходно во средата навечер и конечно го одби египетскиот мировен предлог, засега не го коментираше соопштението на израелската армија.Прекинот на борбените дејствија го предложил специјалниот координатор на Обединетите нации за Блискиот исток, Роберт Сери, потврдил за Reuters неименуван израелски функционер, потврдувајќи ги извештаите на израелските медиуми, веднаш откако стана познато дека Хамас го отфрла предлогот за прекин на огнот дека во судирите досега загинале 220 Палестинци и еден Израелец.Израелската армија, исто така, објави дека ќе спроведе темелна истрага за воздушниот напад во кој во средата на плажа во Газа беа убиени четири палестински деца, што го оцени како „трагичен инцидент“, пренесува AFP.„Темелно го истражуваме тој инцидент. Според прелиминарните резултати од истрагата, цел на нападот биле терористи на Хамас“, соопшти армијата со оцена дека „смртта на цивилите е трагичен исход“.Четири деца загинаа а неколку беа ранети во напад на рибарска колиба на плажа крај градот Газа во која се наоѓала група деца, само 200 метри од хотел во кој се сместени новинари. Воената операција во палестинската енклава Израел ја започна на 7-ми јули. Нејзината цел е да се сопрат ракетните напади од Појасот Газа врз израелската територија и да се поткопа борениот потенцијал на движењето Хамас кое управува со таа енклава од 2007 година и на другите милитантни групи. Ова ќе биде вториот прекин на огнот од израелска страна. Првото шестчасовно еднострано примирје беше прогласено во вторникот додека се чекаше одговорот на Хамас на египетскиот предлог за примирје, кое беше прекинато поради продолжувањето на ракетирањата од страна на милитантите. Операцијата којашто започна како „Линија на одбраната“ а во меѓувреме се споменува и кодниот назив „Неуништлива скала“, сѐ уште се сведува на воздушни удари од дистанца од воздух и од море, и низа специјални операции, но истовремено се прават подготовки за целосна копнена инвазија./крај/мф/сн

Извор: Макфакс