Американскиот државен секретар Џон Кери и министерот за надворешни работи на Русија Сергеј Лавров не успеаја да постигнат договор за прекин на огнот во Сирија и разликите остануваат, изјави висок функционер на Стејт департментот за средбата во понеделникот, додека истовремено исто така во кинески Хангжу на маргините од самитот Г20 претседателите на двете супер сили Барак Обама и Владимир Путин ја одржаа претходно договорената средба која траела подолго од планираното, пренесуваат агенциите.

Ова беше втора средба меѓу американскиот државен секретар Џон Кери и министерот за надворешни работи на Русија Сергеј Лавров на маргините од самитот на Г20 во Кина кој се одржува во неделата и понеделникот, а агенцијата Bloomberg повикувајќи се на неименуван дипломатски претставник на САД пренесува дека двајцата дипломати веќе следните денови уште еднаш ќе се сретнат во обидите да ги приближат ставовите за жешките прашања на меѓународната политичка сцена за кои Вашингтон и Москва имаат спротиставени гледишта.

Веројатно следниот пат ќе се сретнат на маргините од состанокот на Генералното собрание на Обединетите нации во Њујорк на 18-ти септември.

На почетокот од септември Лавров изјави дека тој и Кери од почетокот на 2016 година оствариле повеќе од 40 средби, оценувајќи дека станува збор за преседан во меѓународната дипломатија и билатералните односи меѓу Русија и САД.

Агенцијата Reuters забележува дека ова е втора средба на дипломатите на која не можат да постигнат договор за условите за прекин на огнот во Сирија. Минатиот пат се сретнаа во Женева на 26-ти август, кога Кери изјави дека САД ќе прифатат каков и да е договор само за тој повторно да не пропадне.

Нема детали од разговорот на Кери и Лавров во понеделникот. Претставници на американскиот Стејт Департмент одбиле за Reuters да објаснат поради кои спорни точки не е постигнат договорот. Од руското министерство за надворешни работи, пак, за агенцијата РИА рекле дека на втората средба Лавров и Кери разговарале за заедничките акции за ликвидирање на терористите во Сирија, ако и за тензичните ситуации на Корејскиот полуостров, во Украина и во Јемен.

Русија, имено, има тврд став дека не може да се согласи со договорот доколку опозициските сунитски борци, коишто ја имаат поддршката од САД и од нивните регионални сунитски сојузници од Блискиот исток, не се одвојат од џихадистичката група Џебхат ан-Нусра, која е сириско крило на Ал Каеда, со која кои заедно дејствуваат во неколку сириски покраини.

Истовремено, исто така, на маргините од самитот во Хангжу се сретнаа и рускиот претседател Владимир Путин и американскиот Барак Обама, кои разговарале околу подолго отколку што било планирано, како што истакнал за новинарите портпаролот на Кремљ подолго од планираното кој средбата ја оценил како „добра“.

Средбата дојде откако Обама и Путин во неделата неколкупати разговарале „од нога“, по што американскиот челник предложил да имаат директна средба. Двајцата лидери разговарале половина час очи в очи, а во еден дел од разговорите им се придружиле шефовите на дипломатиите Кери и Лавров, кои претходно се состанаа.

Портпаролот на рускиот претседател Дмитриј Песков, кој присуствувал на еден дел од разговорите меѓу Обама и Путин изјавил дека „средбата беше подолга од планираното … и главно се разговараше за Сирија и Украина… Потоа Обама со Путин разговараше тет-а-тет“, пренесува ТАСС. Песков позитивно ги оцени разговорите и додал дека „работата ќе продолжи“, без да изнесува поединости.

Агенцијата РИА пренесува дека членовите на двете делегации ја напуштиле салата во која се воделе преговорите по 70 минути, оставајќи ги двајцата претседатели сами, кои разговарале уште половина час./крај/мф/сн

Извор: Макфакс