Американскиот државен секретар Џон Кери во средата во телефонскиот разговор со својот руски колега Сергеј Лавров ја истакнал неопходноста рускојазичните бунтовници „да престанат да ги напаѓаат украинските позиции кај Дебалцево и да го прекршуваат прекинот на огнот“, соопшти Стејт департментот, додека шефот на руската дипломатија смета дека како што очекувал настаните во стратешки важниот град во регионот Донбас ќе станат изговор за Западот.

Портпаролката на Стејт департментот, Џен Псаки, истакна дека државниот секретар Џон Кери апелирал да им се овозможи пристап на набљудувачите од мисијата на Организацијата за безбедност и соработка во Европа (ОБСЕ).

Одговарајќи на новинарски прашања, Псаки не се согласи со констатацијата дека станува збор за крајно нарушување на примирјето договорено во Минск.

„Ние не сметаме дека договорот е ’мртов’“, истакна Псаки. Додаде дека Стејт департментот повика да се даде време за спроведување на Минскиот договор./

Одговарајќи на прашање дали настаните околу Дебалцево ќе влијаат врз одлуката на Вашингтон за испорака на смртоносно оружје за украинската армија, Псаки одговори дека „Ние немаме донесено никаква одлука. Имаме многубројни опции за санкции“.

Истовремено според Псаки, набљудувачите на ОБСЕ регистрирале и намалување на насилствата. Притоа не ги коментираше основаностите на изјавите на украинскиот претседател Петор Порошенко за повлекување на украинските војници од Дебалцево, само истакнувајќи дека владата на една држава самата носи одлуки коишто се однесуваат на одбраната на својата земја.

Руското министерство за надворешни работи, од своја страна, пак, за разговорот меѓу Кери и Лавров издаде кусо соопштение во коешто нагласува дека шефот на руската дипломатија ја истакнал важноста на директниот дијалог меѓу Киев со Донецк и Луганск, вклучително и за брзото прекинување на судирите кај Дебалцево.

Претходно Лавров рече дека прекинот на огнот во источна Украина се почитува, освен во Дебалцево. „Главната задача и натаму е прекинот на огнот (…) на многу места бунтовниците соопштија дека се подготвени да го повлечат тешкото оружје“, рече.

Во врска со борбите во Дебалцево, Лавров објасни дека „Ние зборувавме во Минск дека украинската војска таму паднала во обрач, дека е потребно да се зборува за тоа како тие може да го напуштат Дебалцево. Стануваше збор тие да се извлечат чесно, оставајќи го тешкото вооружување, Киев не беше подготвен на тоа. Меѓутоа милициите (како што Москва ги нарекува проруските бунтовници во источна Украина) од самиот почеток рекоа дека нема да дозволат извлекување на тешкото вооружување, зашто украинската војска ќе се прегрупира, ќе отстапи и одново ќе отвори оган (… ). Порошенко тогаш рече дека нема опсада. Како резултат на тоа, се случи она што се случи“, односно бунтовниците навлегоа во вторникот во Дебалцево а по тешките улични борби и напредувањето на бунтовниците, украинските војски со одлука на Киев почнаа да се повлекуваат од средата наутро.

Западните политичари треба да ги охрабрат напорите за постигнување мир во Украина а не да ја поттикнуваат конфронтацијата, порача Лавров.

„Многу полагам во тоа дека одговорните политичари на Западот ќе сторат сé што е во интересот на украинскиот народ и на украинската држава, наместо да ја поттикнуваат конфронтацијата и да го докажуваат своето лидерство со таквите изјави“, додаде Лавров.

„Дебалцево, тоа е изговор, ние уште на 11-ти февруари (ден пред потпишувањето на договорот во Минск), но ни беше кажано дека такво проблем не постои. Оттаму, кон тоа јас би го сметал ова како уште една потврда на неконструктивниот став на Вашингтон, овој пат олицетворен во потпретседателот“ Џозеф Бајден кој претходно изјави дека се можни нови санкции против Русија, поради ситуацијата во Дебалцево./крај/мф/сн

Извор: Reuters/РИА Новости