Единаесет масакрирани тела, од кои многу обезглавени, се пронајдени во четвртокот во југозападно Мексико, во Гереро, истата сојузна држава во којашто пред два месеца беа грабнати и веројатно масакрирани 43 студени на тамошниот педагошки факултет, соопштија локалните власти.
 

Единаесет масакрирани тела, од кои многу обезглавени, се пронајдени во четвртокот во југозападно Мексико, во Гереро, истата сојузна држава во којашто пред два месеца беа грабнати и веројатно масакрирани 43 студени на тамошниот педагошки факултет, соопштија локалните власти.

Телата на коишто биле видливи и траги од мачење, откриени се крај локален пат меѓу местата Чијапа-де-Алварес и Ајијауалуко само неколку часа пред и онака многу критикуваниот мексикански претседател Енрике Пена Нието требаше да објави низа мерки со цел да се подобри редот и мирот во државата којашто од 2006 година секојдневно се бори со бруталното насилство меѓу нарко картелите во коешто се убиени околу 90 илјади луѓе.

На фотографиите коишто ги објавија локалните медиуми, видливи се и тешки изгореници на некои од масакрираните тела. Според привичните сознанија, станува збор за пресметка меѓу две банди од претходната ноќ во борбата за контрола врз дистрибуцијата на наркотици во една од областите во државата Гереро.

Канцеларијата на државниот обвинител на Гереро соопшти дека телата се пронајдени во истата област во којашто се наоѓа радикалниот левичарски педагошки факултет чии 43 студенти беа грабнати.

Во првата седмица од ноември мексиканскиот државен обвинител објави дека студентите кои исчезнаа кон крајот на септември во југозападната сојузна држава Гереро, биле грабнати од полицијата по наредба на локален градоначалник и се верува дека се предадени на припадниците на локална нарко банда кои ги убиле, ги запалиле нивните тела а потоа остатоците ги фрлиле во река.

Здружението на родителите на исчезнатите студенти порача, пак, дека доказите се нецелосни и оти тие веруваат дека нивните деца се живи.

На 29-ти септември исчезнаа 43 студенти од Атцојинапе кои претходните денови, на 26-ти септември, дошле да протестираат во Игуала и да собираат финансиска помош, а по завршување на протестот тргнале кон своите домови со автобуси на јавниот транспорт. Според искази на очевидци, врз автобусите пукале полицајци и вооружени мажи припадници на нарко картелот Герерос Унидос, а потоа студентите ги одвеле во непознат правец.

Мексиканска полиција до сојузната држава Гереро ги објави нивните фотографии и понуди награда од милион пезоси за информации кои би довеле до сознанија за исчезнатите студенти. Опишувајќи ја сојузната истрага како едена од најкомплицираните, обвинителот опиша што се случувало со студентите од учителската школа во Ајотсинапи. Жртви се мажи повеќето во 20-те години од животот кои со автобуси и комбија оделе на протестите во Игуала против финансиските тешкотии во кои било нивното училиште. Учителската школа е стара 80 години и е позната како левичарски бастион, а нејзините студенти се познати по активизмот.

Според мексиканското обвинителство, тројца мажи, уапсени во врска со нивното исчезнување, признале дека погубиле голем број лица за кои се верува дека се исчезнатите студенти. Според нивните искази, полицајците ги предале жртвите на тројца мажи кои припаѓаат на нарко картелот Герерос Унидос.

Мексиканската полиција претходно ги уапси поранешниот градоначалник на Игуала кој беше во бегство, Хозе Луис Абарка и неговата сопруга, осомничени дека го поттикнале нападите во коишто шест лица се убиени а исчезнаа 43-цата студенти, во аферата која со месеци наназад го потресува Мексико и ги доведува во тешка ситуација тамошните власти.

Истрагата покажала дека градоначалникот, кога дознал дека студентскиот протест ќе попречи еден негов официјален јавен настан, му наредил на началникот на полицијата во Игуала, Фелипе Флорес Веласкез, да ги сопре демонстрантите. Шефот на полицијата кој во меѓувреме беше суспендиран и сменет, сѐ уште се наоѓа во бегство.

Властите досега уапсиле 74 лица во врска со исчезнатите студенти. Обвинителството на прес-конференција ги прикажало снимките од признанието на тројцата криминалци, фотографии на местата за одложување отпад на кој телата се запалени и графички и видео прикази на отстранувањето на останките.

„Тие не само што ги спалиле нивните тела сосе облеката, ја запалиле и целата облека на оние коишто учествувале во тоа“, изјави пред извесно време обвинителот Муриљо додавајќи дека се обиделе да ја отстранат секоја можна трага.

Грабнувањето на студентите предизвика протести во целата земја и сериозно ја поткопа вербата во ветувањето на претседателот Енрико Пења Нето дека Мексико во текот на неговиот мандат ќе стане побезбедна земја. По повод сознанијата од истрагата Нето изјави дека откритието е шокантно и порача дека сите виновни за масакрот ќе одговараат. „Истрагата ќе биде спроведена целосно и сите одговорни ќе бидат казнети“, порача мексиканскиот претседател./крај/мф/сн

Извор: Макфакс