Американската војска веројатно ќе задржи поголем контингент војници од предвиденото во Авганистан и во 2015 година, а американските единици ќе можат да им притекнат во помош на авганистанските безбедносни сили доколку се најдат во проблеми, пишува во вторникот AFP повикувајќи се на функционер во Пентагон, откако минатата сабота весникот The New York Times пишуваше дека американскиот претседател Барак Обама потпишал тајна наредба со којашто одобрува поширока борбена мисија во Авганистан следната година отколку што претходно беше планирано и ја продолжил за уште 12 месеци.
 

Американската војска веројатно ќе задржи поголем контингент војници од предвиденото во Авганистан и во 2015 година, а американските единици ќе можат да им притекнат во помош на авганистанските безбедносни сили доколку се најдат во проблеми, пишува во вторникот AFP повикувајќи се на функционер во Пентагон, откако минатата сабота весникот The New York Times пишуваше дека американскиот претседател Барак Обама потпишал тајна наредба со којашто одобрува поширока борбена мисија во Авганистан следната година отколку што претходно беше планирано и ја продолжил за уште 12 месеци.

Првично САД имаа намера да го намалат бројот на своите војници коишто ќе останат во Авганистан по 1-ви јануари 2015 година на 9.800 и коишто ќе имаат само советодавна и улога во увежбување на авганистанските безбедносни сили коишто треба да ја преземат целосно одговорноста за безбедноста во земјата, како и за заштита на американските цели. Меѓутоа, според неименувани извори на агенцијата од министерството за одбрана на САД, проценето е дека до крајот на зимата се потребни меѓу 400 и 700 војници повеќе. „Станува збор само за периодот на транзицијата“, додал соговорникот.

Овие промени во стратегијата се резултат на значителното доцнење во потпишувањето на билатералниот договор за безбедност меѓу Вашингтон и Кабул, кој им овозможува правна безбедност од прогон пред авганистанските судови на американските војници, поради одбивањето да го потпише на поранешниот авганистански претседател Хамид Карзаи, кои препушти тоа да го стори неговиот наследник. Тоа дополнително ги компликуваше договорот со земјите членки на НАТО за распоредување на нивните единици во Авганистан од почетокот на следната година.

Администрацијата на претседателот на САД Барак Обама повеќепати наведе дека борбената мисија на американските војници ќе заври кон крајот на оваа година, со повлекувањето на единиците на НАТО и дека на оние американски единици коишто ќе останат во земјата единствена задача ќе им биде обуката на авганистанската војска.

Вашингтон го ревидирал својот став минатата седмица за да им овозможи на своите војници да им даваат поддршка на Авганистанците во борбата против талибаните. Адмиралот Џон Кирби, портпаролот на Пентагон, изјави дека доколку талибаните ги загрозат американските и авганистанските единици, американската војска го задржува правот да дејствува онака како што смета дека е потребно.

Претходно The New York Times објави дека претседателот Обама потпишал тајна наредба со којашто одобрува поширока борбена мисија во Авганистан во 2015 година отколку што претходно беше планирано. Со оваа одлука им се осигурува на американските војници директна улога во борбите во Авганистан за најмалку уште една година, а американскиот претседател ја донел изминатите неколку седмици на состаноците со своите советници за национална безбедност.

Досега официјалниот став на Вашингтон беше дека борбените операции во Авганистан ќе престанат до крајот на 2014 година, како и дека 9.800 американски војници, со околу три илјади војници од Германија, Италија и други земји, коишто потоа ќе останат во земјата ќе спроведуваат само мисии на поддршка и оспособување на авганистанските безбедносни сили коишто од 1-ти јануари 2015 година треба да ја преземат целосната одговорноста за безбедноста во земјата.

Меѓутоа, според The New York Times, кој цитираше неименуван висок американски функционер, Обама неодамна ја потпишал наредбата со којашто им дозволува на единиците директно да се борат против талибаните и нивните исламистички сојузници во случај ним или на авганистанската влада да им се заканува опасност. Со таа наредба во мисиите е дозволена и воздушна поддршка, вклучително и употреба на борбени авиони, бомбардери и беспилотни летала.

Цивилните советници на американскиот претседател, пишува натаму весникот, се спротиставиле на таквата стратешка промена, но „воените функционери го добија она што го сакаа“, рекол цитираниот функционер.

Други соговорник, пак, нагласил дека повеќе нема да има редовни патроли насочени кон талибаните. Операциите нема повеќе да бидат насочени на талибаните „освен доколку тие не се закануваат на САД или на силите на меѓународната коалиција во Авганистан или директно ја помагаат Ал Каеда“, појаснил.

Оваа промена во стратегијата во Авганистан, според The New York Times, делумно е поврзана со брзото напредување на џихадистите од Исламската држава особено во Ирак, што предизвика критики на сметката на претседателот Обама дека ги повлекол американските единици од Ирак пред ирачката армија да биде навистина подготвена да се соочи со нападите на екстремните сунитски исламисти.

Новиот авганистански претседател Ашраф Гани изгледа дека е поотворен во однос на пошироката американска мисија отколку неговиот претходник Хамид Карзаи, па и тоа игра улога во промената на американската стратегија, смета весникот.

Во Авганистан во моментов има 27 илјади американски војници, додека во периодот кога воените дејствија кулминираа ги имаше повеќе од 100 илјади.

Весникот не прецизира дали одлуката на Обама ќе влијае и врз бројот на американските војници коишто ќе бидат во иднина распоредени во Авганистан./крај/мф/сн

Извор: Макфакс