Рускиот претседател Владимир Путин изјави во петокот во интервјуто за американската агенција Bloomberg дека не знае кој стои зад кибернетичките напади врз Демократската партија, но дека е важно дека тие информации се јавно објавени и нивната суштина.

Два дена пред состанокот на челниците на земјите од групацијата Г20 во Кина, каде што ќе се сретне со американскиот колега по должност Барак Обама и со другите светски челници, рускиот претседател Владимир Путин изјави дека можеби нема да биде можно да се открие кој стои зад објавувањето на чувствителната електронска преписка на раководството на Демократската партија која предизвика потреси во оваа американска партија, но истакна дека тоа не го сторила владата на Русија.

„„Дали е важно кој ги хакирал тие податоци?“, запраша Путин додавајќи дека е „важна содржината којашто е доставена до јавноста“, во својата прва јавна реакција на скандалот за кој американските демократи ја обвинуваат официјална Москва, наводно со цел да му помогне на претседателскиот кандидат на Републиканската партија, Доналд Трамп.

„Нема потреба да се одвраќа вниманието на јавноста од суштината на тој проблем, укажувајќи на некои минорни прашања како што е потрагата по оној кој тоа го сторил. Меѓутоа, повторно сакам да кажам дека не знам ништо за тоа и на државно ниво Русија тоа никогаш не го правела. Владата на Русија никогаш тоа не го правела“, истакна Путин.

Изјавите на американските власти, вклучително и на претседателот Обама и на поранешната државна секретарка Хиулари Клинтон за наводната руска трага во споменатите хакерски напади, Путин уште еднаш истакна во разговорот дека е обид да се одвлече вниманието на американската јавност од суштината на проблемот.

Путин, исто така, одговори на обвинувањата дека Русија преку објавувањето на доверливите документи, се обидува да влијае врз кампањата за претседателските избори во САД кои ќе се одржат на 8-ми ноември.

„За тоа треба да се чувствува нервот и особеностите на внатрешнополитичкиот живот во Соединетите држави. Не сум уверен дека дури и нашите експерти во министерството за надворешни работи го разбираат тоа доволно добро“, појасни Путин.

Хакираната електронска пошта која ја објави активистичката група WikiLeaks во јули пред конвенцијата на Демократската партија, покажа дека партиското раководство ја фаворизирало Хилари Клинтон на партиските избори за претседателски кандидат наспроти сенаторот Берни Сандерс, откривајќи дека дури се препорачувало фабрикување афери против него кои ќе бидат лиферувани преку медиумите.

Поради овој скандал оставка поднесе претседателката на DNC, Деби Васерман-Шулц, а од своите позиции заминаа и нејзината наследничка како претседателката на Националниот комитет на Демократската партија, Ејми Дејзи, финансискиот директор на комитетот Бред Маршал и шефот на одделот за односи со јавноста, Луси Миранда.

Обама во август рече дека ќе разговара за тој кибернетички напад со Путин, доколку се докаже дека зад него стои Русија,м но дека тоа нема натаму да го влошува односите меѓу двете држави кои од 2014 година се на нивото од блоковската Студен војна поради украинската и сириската војна. Клинтон, пак, изјави дека зад нападот стојат руските разузнавачки служби, откако WikiLeaks објави дека нејзината кампања ќе се базира на напади врз Русија.

Претставниците на кампањата на Клинтон зачестија со изјавите дека Русија наводно се обидува да влијае врз резултатот од ноемвриските претседателски избори во САД, но засега таквите тврдења не се поткрепени со докази или конкретни дејствија. Така, агенцијата ТАСС потсетува дека токму Мук на 24-ти јули изјави дека хакери „поврзани со Русија“ го извршиле кибернетичкиот напад врз серверите на Демократската партија за да му помогнат на Трамп, на што со иронија за „хорор приказни“ одговори портпаролот на рускиот претседател Дмитриј Песков негирајќи каква и да вмешаност на официјална Москва.

На 10-ти август разобличувачкиот портал WikiLеаks повикувајќи се на своите „свиркачи“ објави дека новата стратегија којашто ќе ја примени кампањата Хилари Клинтон, ќе биде насочена на обвинувања кон Русија доколку се појават нови доверливи документи во врска со нејзината корумпираност. „Кампањата на Клинтон разработила нова ПР-стратегија. Сите следни откритија за корупција поврзана со неа, ќе бидат претставени како активности на Русија“, беше наведено на акаунтот на WikiLeaks на сервисот на микроблогирање Twitter.

На 10-ти август весникот The New York Times дека саботажата од страна на хакерите била многу посериозна отколку што се сметаше претходно. Според тврдењето на весникот, хакерите успеале да извршат кибернетички упад во електронската пошта на „повеќе од 100 функционери и ограноци“ на демократите, а не само во DNC. Во врска со ова Федералното биро за истраги (FBI) настрана од јавноста, ги известило функционерите чиишто електронски преписки би можеле да бидат украдени, тврди весникот.

Од The New York Times, исто така, тврдат дека цел на кибернетичката саботажа, за којашто демократите вклучително и нивниот актуелен претседател Барак Обама ја обвинуваат Русија, биле и членови на изборниот штаб на Хилари Клинтон и на неа доверливи лица. Жртви на хакирањето биле и членовите на демократскиот комитет кои се занимаваат со собирање доброволни донации и со анализа на расположението на гласачите, како и здружението на гувернерите на сојузните држави од Демократската партија./крај/мф/сн

Извор: Макфакс