Американскиот претседател Барак Обама објави воведување досега најостри санкции против Русија, кои се насочени против клучните руски компании како што се „Газпромбанк“ и „Роснефт“, но други енергетски и компании од воениот комплекс.

Вашингтон досега постапно ги ширеше финансиските санкции против Русија, поради тоа што откако прозападните политички сили преку мартовските безредија дојдоа на власт црноморскиот полуостров Крим на кој 58 отсто од населението се етнички Руси преку референдум ја врати автономијата укината со осамостојувањето на Украина и се присоедини кон Руската Федерација, што САД и ЕУ го сметаат за руска анексија на украинска територија. Исто така, САД ја обвинуваат Москва дека се меша во внатрешните работи на соседната земја, што руската дипломатија одлучно го отфрла токму за истото обвинувајќи го Вашингтон како поттикнувач на безредијата и употребата на сила при соборувањето на поранешниот претседател Виктор Јанукович кој важеше за проруски ориентиран.Американскиот претседател Барак Обама, објавувајќи го новиот круг заострени санкции ноќта кон четвртокот, изјави дека САД се подготвени да воведат и дополнителни санкции, доколку Русија не презема конкретни потези за смирување на судирите во Украина. Претходно руската страна повеќепати соопшти дека има делумно влијание врз проруските бунтовници во југоисточните области на Украина, но дека не ги помага ниту со доставување на оружје, ниту финансиски и со инструктори, како што тврди Западот, како и дека конфликтот го смета за внатрешно прашање на земјата кое треба да се реши преку сеопфатни директни разговори меѓу властите во Киев сите политички субјекти и претставниците на сите региони во земјата. Новите американски санкции се однесуваат и на втората најголема руска компанија во производството на гас „Новатек“, на ВЕБ, државната банка преку којашто се извршуваат сите плаќања на руската влада, како и на осум претпријатија кои произведуваат оружје. Со санкциите сепак не е опфатен енергетскиот гигант „Газпром“, најголемиот произведувач на природен гас во светот кој обезбедува голем дел од европските потреби од енергија.„Овие санкции се оспежни, но тие исто така се насочени за да имаат максимално влијание врз Русија, како и да го лимитираат влијанието врз американските компании или компаниите на нашите сојузници“, изјави Обама. Претходно американските медиуми пишуваа дека е проблематично дали тамошните компании ќе дадат поддршка за санкциите.Новите американски санкции против Русија беа објавени речиси истовремено кога и челниците на Европската унија во Брисел „се согласија да ги прошират рестриктивните мерки“ против Русија, поточно не успеаја да се договорат и покрај притисокот и инсистирањето на САД да воведат насочени санкции кон рускиот финансиски и економски сектор.Со новите санкции на САД и ЕУ се опфатени вкупно 72 руски високи функционери, како и челници на украинските проруски бунтовници и фирми од побунетите региони.„Ја нагласивме нашата желба украинската криза да се реши по дипломатски пат… мораме да видиме конкретни дела, не само зборови, дека Русија навистина е предадена на решавањето на тој судир“, рече Обама, додавајќи дека Русија и натаму „ги поддржува проруските сепаратисти во источна Украина, како и дека преку границата испраќа борци и оружје“./крај/мф/сн

Извор: Reuters