Европа
Русија би можела да започне офанзива против Украина за две недели, оценуваат американски официјални лица

Американските власти истакнуваат дека американската разузнавачка служба проценува дека Русија подготвува голема инвазија на Украина и дека веќе располага со 70 отсто од силите потребни за таква операција. Москва веќе има собрано 110.000 војници на границата со Украина и би можела да има доволен капацитет да започне офанзива за две недели, оценуваат американски официјални лица кои ги информираа членовите на американскиот Конгрес и американските европски партнери во последните денови.
Тие изјавија дека американската разузнавачка служба не утврдила дали рускиот претседател Владимир Путин донел одлука да оди во офанзива, но дека сака да си ги обезбеди сите можни опции, од делумна инвазија на сепаратистичката енклава Донбас на исток до целосна инвазија.
„Со темпото со кое руските воени сили продолжуваат да се зајакнуваат околу Украина, Путин би можел да има доволно сили за голема инвазија, или 150.000 војници, во средината на февруари“, предупредија официјалните лица.
Доколку рускиот претседател ја избере најрадикалната опција, би можел да го опколи Киев, главниот град на Украина и да го собори претседателот Володимир Зеленски за 48 часа, проценуваат тие.
Тие предупредија дека конфликтот може да има значителна цена за човечките животи и дека може да бидат убиени меѓу 25.000 и 50.000 цивили, меѓу 5.000 и 25.000 украински и 3.000 до 10.000 руски војници. Тоа може да предизвика и прилив од еден до пет милиони бегалци, главно во Полска.
Првиот контингент американски војници вчера пристигна во Полска, каде што американскиот претседател Џозеф Бајден одлучи да испрати засилување за да ја одбрани земјата од каква било агресија, додека во тек се дипломатски активности за да се убеди Москва да ги повлече своите војници на границите на Украина.
Русија негира дека планира каква било инвазија, нагласувајќи дека сака само да ја гарантира својата безбедност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Погодена рафинерија во Русија, гори огромен резервоар за гас

Украинците во текот на ноќта со беспилотни летала ја нападнаа руската рафинерија Туапсе во Краснодарската територија.
Според руските канали на Телеграм, жителите слушнале десетина експлозии во рафинеријата околу 3 часот по полноќ по локално време. Тие се пожалија дека предупредувањето за опасност од воздух било издадено потоа.
A Ukrainian drone delegation traveled to Tuapse in the Krasnodar region for negotiations.
The russians did not receive the visitors respectfully, and heated discussions ensued.
During the tense negotiations, the situation became very loud, leading to one of the tanks at the… pic.twitter.com/R6GqV6ZGCq
— Jürgen Nauditt 🇩🇪🇺🇦 (@jurgen_nauditt) March 14, 2025
На социјалните мрежи се проширија фотографии и видеа од пожарот во рафинеријата. Каналот на Телеграм, Mash објави дека експлозии предизвикале пожар во нафтената рафинерија Туапсе. Руски извор тврди дека имало „пад на остатоци од соборен дрон“.
Гувернерот на Краснодарската територија Вениамин Кондратиев го потврди нападот врз рафинеријата и извести дека „еден од резервоарите со бензин се запалил“. „Пожарот се прошири на површина од над 1.000 квадратни метри“, додаде тој.
Sanctions in Tuapse 🔥👍 pic.twitter.com/DzjIJMmczv
— MAKS 24 🇺🇦👀 (@Maks_NAFO_FELLA) March 14, 2025
Инаку, оваа рафинерија веќе беше нападната ноќта меѓу 25 и 26 февруари. Нападот предизвика и пожар и оштети опрема за рафинирање нафта. Одговорноста за нападот тогаш ја презеде Украинската одбранбена разузнавачка служба.
Европа
Португалија се откажа од планот да купи американски Ф-35

Министерот за национална одбрана на Португалија, Нуно Мело, објави дека неговата земја нема да набавува борбени авиони Ф-35 од САД, имајќи го предвид актуелниот геополитички контекст и непредвидливоста на американската политика, пишува португалскиот Подер Аеро.
Мело нагласи дека, иако Ф-16 на португалските воздухопловни сили се приближуваат кон крајот на работниот век, неопходно е да се проценат опциите кои обезбедуваат поголема предвидливост и оперативна безбедност.
Тој напомена дека се разгледуваат европски производствени алтернативи, исто така со цел да се генерираат економски придобивки за Португалија.
Министерот нагласи дека неодамнешната позиција на САД во контекст на НАТО и меѓународното геостратешко сценарио бара длабоко размислување за најдобрите опции за национална одбрана. Предвидливоста на сојузниците е клучен фактор во одлуката за замена на борбени авиони.
Иако не ги прецизираше моделите, Мело сугерираше дека француските алтернативи, како што е Dassault Rafale, би можеле да бидат меѓу опциите што ги разгледува португалската влада. Понатаму, министерот не ја исклучи можноста за испраќање на португалски воен персонал во Украина, под услов тие да бидат во мировни мисии и во сценарио за прекин на огнот.
Овие изјави одразуваат стратешка преоценка на сојузите и воените набавки на Португалија, со цел да се обезбеди националниот суверенитет и ефикасноста на вооружените сили во меѓународното сценарио кое постојано се менува.
Европа
Корупциски скандал во Брисел, „Хуавеј“ осомничен за поткуп на европратеници

Кинескиот технолошки гигант „Хуавеј“ е во центарот на новиот случај на корупција во Брисел. Денеска, белгиската полиција изврши претрес во домовите на неговите лобисти, откриваат Follow the Money и нивните медиумски партнери Le Soir и Knack.
Властите се сомневаат дека лобистите на „Хуавеј“ им дале мито на членовите на Европскиот парламент во замена за поддршка на нивната кауза во Европската Унија. Речиси 15 поранешни и сегашни пратеници се на радарот на истражителите, се дознава.
Во раните утрински часови белгиската федерална полиција изврши претрес во канцеларијата на „Хуавеј“ во ЕУ и во домовите на лобистите за кинеската технолошка компанија под сомнение за поткуп, фалсификување, перење пари и злосторничко здружување, изјавија луѓе блиски до истрагата за Follow the Money и белгиските медиуми Le Soir и Knack.
Вкупно 21 локација во Брисел, Фландрија, Валонија и во Португалија беа претресени како дел од широката истрага за корупција. Запленети се повеќе документи и предмети, но не се извршени претреси во Европскиот парламент.
Полицијата бара докази дека претставници на кинеска компанија го прекршиле законот при лобирање кај членовите на Европскиот парламент (ЕП), велат извори. Рациите во зората беа дел од истрагата на тајната полиција, која почна пред речиси две години по дојава од белгиската тајна служба.
Според еден извор близок до случајот, „петнаесетина (поранешни) пратеници се на радарот“ на истражителите. За сегашните европратеници, белгиските обвинители ќе мора да побараат од Европскиот парламент да им го укине имунитетот за да може да истражат понатаму. Такво барање сѐ уште не е поднесено, велат изворите.
Канцеларијата на белгиското федерално обвинителство потврди дека неколку лица биле испрашани. Тие ќе бидат сослушани за нивната наводна вмешаност во практики на поткуп во Европскиот парламент и за фалсификување и употреба на фалсификувани документи. Се претпоставува дека делата ги извршила криминална организација.