Делови од Босна и Херцеговина се уште се отсечени од светот и без струја поради снежните наноси, а голем број патишта во таа земја се уште се непроодни за целиот сообраќај, известија службите задолжени за итни интервенции.

Најтешка е состојбата во северозападните и северните делови од земјава, а особено се погодени општините како Дрвар, Кнежево, Лопар и Угљевиќ.

„Селата се блокирани“, изјави градоначалникот на Кнежево, Горан Боројевиќ за локалните медиуми, предупредувајќи дека верува дека има ранливи жители со кои нема комуникација.

Според податоците на РХМЗ РС во Кнежево висината на снегот е 110 сантиметри, но мештаните велат дека наносите се многу поголеми и дека достигнуваат висина од три метри.

„Сè е блокирано. Ситуацијата е тешка. Градот некако го исчистивме, струја немаме, вода засега. Имаме тројца загинати колку што знам. Меѓутоа, проблемот е што многу села немаат сигнал, ние воопшто немаме врска со нив и не знаеме што се случува таму и дали има итни случаи“, рече началникот.

Градовите и населбите во областа Шемберија и Мајевица трет ден се без струја откако снегот го оштети далноводот во тоа подрачје и екипите за поправка не можат да стигнат до столбовите поради обилниот снег.

Автомото клубот на Босна и Херцеговина (БИХАМК) соопшти дека поради снег целосно се затворени патиштата од Бихаќ кон Босански Петровац и Кључ, како и од Дрвар кон Босански Петровац и Гламоч.

Забранет е целокупниот сообраќај на возила и на релации Гламоч-Млиниште и Купес-Ново Село. Прекината е и трасата од Бања Лука до Кнежево како и од Котор Варош до Теслиќ.

Сообраќајот на камиони е забранет на низа други патни правци, особено на оние што минуваат низ планинските превои.

Слаб снег денеска падна во делови од Босна и Херцеговина, а состојбата се очекува да се подобри од утре кога се прогнозира дека врнежите ќе престанат и времето ќе се разведри.

Селото Пепелари, кое се наоѓа во близина на Зеница, четврти ден е целосно отсечено од остатокот од светот поради обилните снежни врнежи.

Klix.ba пишува дека висината на снегот надминува еден метар, а засега никој не презел конкретни мерки за пробивање до селото. Жителите се очајни, особено поради фактот што во селото живеат голем број болни и стари лица, на кои итно им е потребна помош.

Утрово со теренско возило со помош на мештанин била евакуирана постара жена од селото. Сепак, остатокот од околу 300 жители, меѓу кои има и деца, се уште се отсечени.

Селото четири дена е без струја, а мештаните велат дека од војната не биле во таква изолација. Од ден на ден расте паниката кај жителите, додека патните служби на Град Зеница се уште не се дојдени да го направат патот прооден.

Екипата за брза помош од Бања Лука четири часа се бореше низ снегот за да стигне до детето чиј живот беше во опасност.

Оваа информација на Фејсбук ја објави еден од работниците на итната служба кој рече дека не се откажуваат без оглед на невозможните услови. На крајот успеале да му ја пружат потребната помош.

„Пример за луѓе кои покажаа најголем степен на хуманост и дружељубивост се медицинските лица од Бања Лука кои поминаа четири часа низ снегот за да стигнат до дете кое било приклучено на респиратор, а сето тоа отако снемало струја поради лошото време“, изјави вработен во Итната помош.

Руските власти на Крим ќе прогласат вонредна состојба поради излевање на мазут во Црното Море, откако два танкери потонаа во Керченскиот теснец, соопшти денеска гувернерот на Крим, Сергеј Аксенов.

„Вчера разговаравме со сите наши колеги, со одлука на претседателот на Руската Федерација Владимир Путиn ќе биде воведена вонредна состојба на федерално ниво“, рече Аксенов, пренесува Интерфакс.

Во средата вечерта во Краснодарската територија беше прогласена вонредна состојба, а министерот за вонредни ситуации пристигна во градот Анапа за да ја надгледува работата за отстранување на последиците од излевањето нафта, пренесува Танјуг.

Во средината на декември танкерите Волгоњефт 212 и Волгоњефт 239 потонаа во Керченскиот теснец, а еден член на екипажот загина.

Шест лица, меѓу кои и едно деветгодишно момче, се повредени вчера во Њујорк, кога автомобил влета во пешаци на плоштадот Хералд.

Несреќата се случила околу 16 часот, на сообраќајна раскрсница, а според американските медиуми три лица, меѓу кои и едно момче, се пренесени во болница. Детето се здобило со повреди на ногата, како и жената (49), додека третото лице се здобило со повреди на главата. Останатите тројца повредени, сите жени на возраст од 19 до 49 години, одбиле понатамошно лекување.

Според полицијата, на таксистот најверојатно му се слошило зад воланот, поради што изгубил контрола и влетал во пешаците. Возачот е пренесен во болница на распит, а засега никој не е уапсен.

„Моите мисли се со повредените. Се надевам дека таксистот ќе бидат добро“, изјави Чарлтон Д’Силва од Пасенџерс Јунајтед.

Полицијата соопшти дека таксито патувало на север на Шестата авенија кога излетало на тротоарот. На видеото од местото на настанот се гледа уништено такси на тротоарот. Очевидци велат дека глетката била шокантна.

Раџан Такер гледал како таксистот ја прегазил сопругата. Тој вели дека се движеле по тротоарот и ништо не слушнале, а неговата сопруга била удрена.

„Мојата сопруга беше погодена некаде над рамото. Таа се сврте, тој не ја собори на земја”, рекол Такер.

Тој рече дека ја проверил сопругата за да се увери дека е добро, а потоа го видел момчето заробено под возилото.

„Тој беше заробен под гумата, а кога го преместивме автомобилот, сфативме дека неговата мајка е под автомобилот. Таа беше свесна и зборуваше со него и го одржуваше смирен“, рече Такер.

Такер рече дека тој и другите пешаци го нишале автомобилот наназад за да ги ослободат момчето и неговата мајка, кои биле туристи од Австралија. Тој рече дека повреденото момче му кажало дека тоа за него е најлошиот одмор досега.