Почнува судскиот процес за организаторите на насилствата од 27 април во Собранието во Кривичниот суд во Скопје. Обвинети во овој предмет се поранешниот претседател на Собранието, Трајко Вељаноски, ексминистрите за транспорт и врски и за образование, Миле Јанакиевски и Спиро Ристовски, како и поранешниот директор на УБК, Владимир Атанасовски. Тие се товарат дека сториле кривично дело „терористичко загрозување на уставниот поредок и безбедноста“.

Според ОЈО, осомничените на почетокот на 2017 година подготвиле и реализирале план со намера да оневозможат мирно примопредавање на власта. За таа цел, ги организирале и материјално ги поддржале масовните протести, најпрвин пред Државната изборна комисија, а потоа и протестите на движењето „За заедничка Македонија“ кои кулминираа со насилното влегување во Собранието на 27 април.

Во истрагата беа опфатени и поранешниот премиер Никола Груевски и ексразузнавачот Никола Бошковски, но постапката за нив е запрена додека не станат достапни на органите на прогон.

Времето денеска ќе биде сончево со мала до умерена облачност. Ќе дува слаб до умерен ветер од северозападен правец, поизразен вдолж Повардарието. Кон крајот на денот облачноста ќе се зголеми и во крајните северни и североисточни делови ќе има услови за слаб дожд и провејување на слаб снег. Максималната температура ќе биде во интервал од 6 до 13 степени.

Во Скопје во текот на денот ќе биде претежно сончево, кон крајот на денот облачноста ќе се зголеми и ќе дува слаб до умерен северен ветер. Максималната температура ќе достигне 10 степени.

Од „ЕВН Македонија“ АД добиено е известување дека се планирани технички зафати во електросистемот на град Скопје и без електрична енергија ќе останат делови на Чучер Сандево, Сарај, Кисела Вода и Ѓорче Петров.

Без струја од 9 до 14 часот ќе бидат корисниците од дел од село Семениште (среде село) (општина Сарај), од 9 до 12 часот корисниците од дел од булеварот Партизански одреди и улицата Костурски херои кај Градежниот факултет (општина Центар), како и ХЕЦ „Хидроинвест“, ХЕЦ ЕМК МКЕ 115, дел од селото Мирковци, селото Бањани, селото Чучер, селото Сандево, селото Горњани, караулата „Рамно“, манастирот „Св. Илија“ (општина Чучер Сандево).

Од 8.30 до 10 часот струја ќе немаат корисниците од село Глумово, село Шишево, село Матка, стопанските објекти, „Адријус“, „Бис оил“, „Глумово тијамо“, дел од село Сарај (објекти во близина на клучката кај Матка) (општина Сарај), од 12.30 до 16 часот корисниците од улицата Мариовска, Мариовска подулица со број 1, улицата Фредерик Шопен и улицата Томе Арсовски (општина Кисела Вода), од 10 до 13 часот корисниците на дел од улицата Црногорска на пат за с. Кондово (општина Ѓорче Петров), од 12 до 15 часот корисниците на дел од улиците Михаил и Ефтихиј и Ѓорги Димитров (општина Кисела Вода), од 9.30 до 13 часот корисниците на дел од село Кучково (викендичките) (општина Ѓорче Петров).